पुण्यातील दांडेकर पुलाजवळील इमारतीतील 11 गाड्या जळून खाक 

पुण्यातील दांडेकर पुलाजवळील इमारतीतील 11 गाड्या जळून खाक झाल्याची घटना समोर आली आहे.

ठळक मुद्देपुण्यातील दांडेकर पुलाजवळील इमारतीतील 11 गाड्या जळून खाक झाल्याची घटना समोर आली आहे. 6 दुचाकी, एक रिक्षा पूर्णपणे जळून खाक झाल्या. तर 4 दुचाकींना आगीची झळ लागलीकोणीतरी जाणीवपूर्वक ही आग लावल्याचा संशय आहे.

पुणे - पुण्यातील दांडेकर पुलाजवळील इमारतीतील 11 गाड्या जळून खाक झाल्याची घटना समोर आली आहे. पार्किंगमधील गाड्यांना लावलेल्या आगीत पहाटे 11 गाड्या जळून खाक झाल्या. ही घटना पहाटे दोन वाजण्याच्या सुमारास दांडेकर पुलाजवळील विघ्नहर्ता इमारतीच्या पार्किंगमध्ये घडली असल्याची माहिती मिळत आहे. 

दांडेकर पुलाजवळील सिंहगड रोडवरील साने गुरुजी शाळेसमोर विघ्नहर्ता ही इमारत आहे. या इमारतीच्या तळमजल्यावरील पार्किगमध्ये गाड्या पार्क करण्यात आल्या होत्या. पहाटेच्या सुमारास त्यांना कोणीतरी आग लावून दिली. 1 वाजून 52 मिनिटांनी अग्निशमन दलाला याची माहिती मिळाली. त्यांनी तातडीने दोन गाड्या घटनास्थळी पाठविल्या. त्यांनी काही मिनिटातच ही आग विझविली. 11 गाड्यांना आग लागली. त्यामध्ये 6 दुचाकी, एक रिक्षा पूर्णपणे जळून खाक झाल्या. तर 4 दुचाकींना आगीची झळ लागली. कोणीतरी जाणीवपूर्वक ही आग लावल्याचा संशय आहे.

गेल्या काही वर्षांपासून पार्क केलेल्या गाड्यांना आगी लावल्याचे सुरू असलेले लोण काही केल्या थांबताना दिसत नाही. एखाद्याचा भांडणाचा राग काही मुले वाहनांना आगी लावून काढताना दिसत आहे. त्यात ज्यांचा काही संबंध नाही अशा सामान्यांना मोठा आर्थिक भुर्दंड बसत आहे.