महागणपतीला १५१ डझन डाळिंबांचा नैवेद्य

लोकमत न्यूज नेटवर्क

रांजणगाव गणपती : विनायक चतुर्थीनिमित्त श्री महागणपतीला १५१ डझन डाळिंबांचा नैवेद्य व फुलांची आकर्षक सजावट करण्यात आली.

विनायक चतुर्थी, शेषात्मज गणेशजयंती तथा श्रीशेषात्मज जन्मोत्सव निमित्ताने

अष्टविनायक तीर्थक्षेत्र श्रीक्षेत्र रांजणगाव गणपती देवस्थान ट्रस्टच्या वतीने पहाटे ५ वाजता अभिषेक व नैमित्तिक पूजा करण्यात आली.

देवस्थानच्या वतीने दुपारी १२ वाजता महापूजा व महानैवेद्य करण्यात आला.

दर वर्षी श्रीक्षेत्र रांजणगाव गणपती येथे देवस्थान ट्रस्टच्या वतीने मोठ्या प्रमाणात ज्येष्ठ शुद्ध चतुर्थीला गणेश जन्मोत्सव साजरा करताना श्रीगणेश ग्रंथ पारायण, श्रीगणेश प्रवचन व कीर्तन सप्ताह, ज्येष्ठी श्रीगणेश जन्मोत्सव, महागणपती विवाह सोहळा साजरा केला जातो. परंतु कोरोना विषाणूच्या संकटामुळे श्री महागणपती मंदिर, रांजणगाव भाविकांसाठी शासनाच्या आदेशानुसार बंद आहे. यामुळे सोमवारी विनायकी चतुर्थी शेषात्मज गणेश जयंती तथा श्रीशेषात्मज जन्मोत्सवाचे निमित्ताने होणारे सर्व कार्यक्रम रद्द केले आहेत.

गणेशभक्त पंढरीनाथ विठोबा फलके ( शिरूर) यांसकडून विनायकी चतुर्थीनिमित्त महागणपतीस १५१ डझन डाळिंबांचा महानैवेद्य व गाभाऱ्यात फुलांची आकर्षक सजावट करण्यात आली. कोरोना विषाणूचा प्रसार व प्रादुर्भाव रोखण्यासाठी शासन निर्णयानुसार प्रतिबंधात्मक उपाय म्हणून मंदिर भाविकांना दर्शनासाठी पूर्णपणे बंद असून ‘श्री’ची दैनंदिन पूजा, धार्मिक विधी नित्यनियमाने सुरू आहेत. त्या वेळी देवस्थान ट्रस्टचे विश्वस्त मंडळ ॲड. विजयराज दरेकर, डॅा. संतोष दुंडे, प्रा. नारायण पाचुंदकर, व्यवस्थापक बाळासाहेब गोऱ्हे, हिशेबनीस संतोष रणपिसे तसेच पुजारी मकरंद कुलकर्णी व पुजारी प्रसाद कुलकर्णी उपस्थित होते.

फोटो:रांजणगाव येथील श्री महागणपतीला डाळिंब फळांचा नैवेद्य व फुलांची आकर्षक सजावट करण्यात आली होती.