PMPML चा एका दिवसात २ कोटींचा गल्ला; तब्बल १२ लाख २३ हजार जणांचा प्रवास

एकाच दिवसात तब्बल १२ लाख २३ हजार प्रवाशांनी प्रवास केला....

पुणे : दिवाळीची सुट्टी संपल्याने बाहेरगावी गेलेले चाकरमानी शहरात परतल्याने पीएमपीत प्रवाशांची मोठ्या प्रमाणावर गर्दी होत आहे. या पार्श्वभूमीवर प्रवाशांची गैरसोय होऊ नये तत्पर बससेवा देण्याचे आदेश अध्यक्ष व व्यवस्थापकीय संचालक यांनी सर्व अधिकारी यांना दिले होते.

सोमवारी (दि. २०) एकूण १६९८ बसेस संचलनात होत्या व जास्त उत्पन्नाच्या मार्गावर जादा बस सोडण्यात आल्या होत्या. त्यातून परिवहन महामंडळाला एकाच दिवसात २ कोटी ६ लाख ३१ हजार ९४५ रुपयांचे विक्रमी उत्पन्न मिळाले. एकाच दिवसात तब्बल १२ लाख २३ हजार प्रवाशांनी प्रवास केला.

मजूर, कामगार, नोकरदार, ज्येष्ठ नागरिक, महिला प्रवाशांनी पीएमपीएमएलच्या बससेवेवर नेहमीच विश्वास दाखवला आहे. त्याचबरोबर शहरातील शाळा व कॉलेज पुन्हा पूर्ण क्षमतेने सुरू झाल्याने दररोज प्रवास करणाऱ्या विद्यार्थी संख्येत देखील लक्षणीय वाढ झाली आहे. दैनंदिन प्रवासी संख्या व दैनंदिन उत्पन्नामध्ये झालेली वाढ ही प्रवाशांनी पीएमपीएमएलच्या बससेवेवर दाखविलेला विश्वास आहे.

- संजय कोलते, व्यवस्थापकीय संचालक, पीएमपीएमएल