Pune: विनाझाकणाच्या टाकीत पडून २ वर्षांच्या चिमुकल्याचा मृत्यू, ठेकेदारावर गुन्हा दाखल
By ऑनलाइन लोकमत | Published: April 11, 2024 10:24 AM2024-04-11T10:24:06+5:302024-04-11T10:24:17+5:30
याप्रकरणी लोणी काळभोर पोलिसांनी ठेकेदारावर गुन्हा दाखल केला आहे...
Pune: विनाझाकणाच्या टाकीत पडून २ वर्षांच्या चिमुकल्याचा मृत्यू, ठेकेदारावर गुन्हा दाखल
पुणे : बांधकाम साइटवर बांधलेल्या पाण्याच्या टाकीत पडून दोन वर्षांच्या चिमुकल्याचा मृत्यू झाला. ही घटना लोणी काळभोर येथील रायवाडी रोडवरील गणेश खेडेकर यांच्या बांधकाम साइटवर ६ एप्रिल रोजी सकाळी पावणेबाराच्या सुमारास घडली. याप्रकरणी लोणी काळभोर पोलिसांनी ठेकेदारावर गुन्हा दाखल केला आहे.
प्रिन्स चंद्रकुमार कोशले (२) असे मृत्यू झालेल्या मुलाचे नाव आहे. याप्रकरणी बापू शिवराम माने (४४, रा. साठेवस्ती, लोणी काळभोर, ता. हवेली) याच्यावर निष्काळजीपणामुळे मृत्यूस कारणीभूत ठरल्याप्रकरणी गुन्हा दाखल करण्यात आला आहे. याबाबत पोलिस हवालदार विजय नथू जाधव यांनी लोणी काळभोर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, रायवाडी रोडवर गणेश खेडेकर यांचे बांधकाम सुरू आहे. आरोपी बापू माने हा बांधकाम साइटवर ठेकेदार म्हणून काम करतो. माने याने घराच्या कन्स्ट्रक्शन साइटवर काम करताना दुर्लक्ष करून निष्काळजीपणे अंडरग्राउंड पाण्याची टाकी बांधली. मात्र, पाण्याच्या टाकीवर झाकण टाकले नाही. मृत प्रिन्स खेळत असताना झाकण नसलेल्या पाण्याच्या टाकीत पडला. टाकीत असलेल्या पाण्यात बुडून प्रिन्सचा दुर्दैवी मृत्यू झाला. याप्रकरणाचा पुढील तपास पोलिस उपनिरीक्षक तरटे करत आहेत.