मोबाईलवर पॉर्न व्हिडिओ दाखवून ९ वर्षांच्या मुलीवर बलात्कार करणाऱ्यास २० वर्षे सक्तमजुरी

ही घटना ७ जानेवारी २०१८ रोजी घडली होती...

पुणे : मोबाईलवर पॉर्न व्हिडिओ दाखवून ९ वर्षांच्या मुलीवर बलात्कार करणाऱ्या नराधमाला न्यायालयाने २० वर्षे सक्तमजुरीची शिक्षा सुनावली. तसेच ७५ हजार रुपयांचा दंड ठोठावला आहे. विशेष न्यायालयाचे न्यायाधीश श्रीपदा पोंक्षे यांनी हा निकाल दिला. पवन राज कुडाळकर (वय २४) असे शिक्षा झालेल्याचे नाव आहे. डीएनए चाचणीचा सकारात्मक अहवाल आणि पीडित मुलीची साक्ष महत्त्वाची ठरली.

ही घटना ७ जानेवारी २०१८ रोजी घडली होती. पीडितेच्या आईने जेजुरी पोलीस ठाण्यात फिर्याद दिली होती. पीडित लहान मुलाबरोबर खेळत होती. त्यावेळी कुडाळकर याने मुलाला १० रुपये देऊन खाऊ आणण्यास पाठविले. पीडित मुलीला घरात घेऊन गेला आणि तिला व्हिडिओ दाखवून तिच्यावर बलात्कार केल्याचे फिर्यादीत म्हटले आहे.

या खटल्यात विशेष सरकारी वकील अरुंधती रासकर यांनी १३ साक्षीदार तपासले. त्यात या पीडित मुलीची साक्ष महत्त्वाची ठरली. कुडाळकर याला बलात्कार केल्याबद्दल २० वर्षे सक्तमजुरी आणि ५० हजार रुपये दंड, तर बाललैंगिक अत्याचार प्रतिबंधक कायदा कलम ६नुसार ३ वर्षे तुरुंगवास आणि २५ हजार रुपये दंडाची शिक्षा सुनावली.