वीजचोरांकडून ३ कोटी ४२ लाखांची वसुली

लोकमत न्यूज नेटवर्क

पुणे : गेल्या ऑगस्टनंतर पुन्हा या महिन्यात एकाच दिवशी पुणे प्रादेशिक विभागात राबविलेल्या विशेष मोहिमेत महावितरणने २ हजार २३७ ठिकाणी वीजचोऱ्या व विजेचा अनधिकृत वापर उघडकीस आणला आहे. तसेच नियमाप्रमाणे दंड व चोरीच्या वीजवापरासह सुमारे ३ कोटी ४२ लाख रुपयांच्या वीजबिलांची वसुली केली आहे.

पुणे प्रादेशिक विभागात वितरण व वाणिज्यिक हानी कमी करण्यासाठी वीजचोरीविरुद्ध नियमित कारवाई सुरू आहे. बिलांचा भरणा न करणाऱ्या वीजचोरांविरुद्ध भारतीय विद्युत कायद्याचे कलम १३५ नुसार फौजदारी कारवाई करण्यात येत आहे.

घरगुती, वाणिज्यिक, औद्योगिक, कृषी आदींच्या १८ हजार ३७ वीजजोडण्यांची तपासणी केली. यातल्या २२३७ ठिकाणी वीजचोऱ्या व अनधिकृत वीजवापर आढळून आला. या मोहिमेत सुमारे २० लाख ६६ हजार युनिटची वीजचोरी झाल्याचे प्राथमिक तपासणीत आढळल्याने त्याच्या वसुलीसाठी सुमारे ३ कोटी १८ लाख २५ हजार रुपयांचे वीजबिल संबंधीत ग्राहकांना देण्यात आले. त्याचा भरणा न केल्यास फौजदारी कारवाई करण्यात येईल.