ब्रांच मॅनेजरला ट्रेडिंगचे आमिष दाखवून ७ लाखांचा गंडा

गुंतवणूक केल्यास प्रचंड पैसे मिळतील, असे भासवून तक्रारदार यांना पैसे गुंतवण्यास भाग पाडले

पुणे: ट्रेडिंगमध्ये गुंतवणूक केल्यास चांगला परतावा मिळेल, असे आमिष दाखवून ब्राँच मॅनेजरची फसवणूक केल्याचा प्रकार समोर आला. याप्रकरणी गुरुवारी (दि. २२) भारती विद्यापीठ पोलिस ठाण्यात तक्रार दाखल करण्यात आली आहे.

पोलिसांनी दिलेल्या माहितीनुसार, अजेंद्र अशोक अग्रहारी (वय - ३३, रा. कोंढवा रोड) यांनी फिर्याद दिली आहे. हा प्रकार १६ जून २०२३ ते १६ सप्टेंबर २०२३ दरम्यान घडला आहे. फिर्यादीत म्हटल्याप्रमाणे तक्रारदार यांना अनोळखी मोबाईल क्रमांकावरून फोन आला. विधी सोनी बोलत असल्याचे सांगून ट्रेडिंगमध्ये पैसे गुंतवल्यास भरपूर नफा मिळेल, असे सांगितले. तक्रारदार यांनी ट्रेडिंगमध्ये गुंतवणूक करण्यास होकार दिल्याने त्यांना एका टेलिग्राम ग्रुपमध्ये ॲड केले. गुंतवणूक केल्यास प्रचंड पैसे मिळतील, असे भासवून तक्रारदार यांना पैसे गुंतवण्यास भाग पाडले. त्यानंतर बनावट वेबसाईटच्या आधारे खोटा नफा मिळत असल्याचे भासवून तक्रारदार यांना एकूण ७ लाख २० हजार रुपये भरण्यास प्रवृत्त केले; मात्र प्रत्यक्षात ते पैसे विड्रॉल केले असता त्यामध्ये अडचणी येत होत्या, त्यामुळे तक्रारदार यांनी विचारणा केली असता पैसे काढण्यासाठी आणखी पैसे भरावे लागतील, असा तगादा लावण्यात आला. आपली फसवणूक झाली असल्याचे तक्रारदार यांच्या लक्षात आले. या प्रकरणी भारती विद्यापीठ पोलिस ठाण्यात माहिती तंत्रज्ञान कायद्यांतर्गत फसवणुकीचा गुन्हा दाखल करण्यात आला आहे. पुढील तपास पोलिस निरीक्षक मंगल मोंढवे करत आहेत.