दिवाळीच्या ७ दिवसांत PMP ला ९ कोटींचा गल्ला; फुकट्यांकडून वसूल केला दीड लाखाचा दंड

पीएमपीमधून विना तिकीट प्रवास करणाऱ्या प्रवाशांची संख्या दरवर्षी नवा विक्रम नोंदवत आहे....

पुणे : आनंद, चैतन्य आणि उत्साह घेऊन येणारी दिवाळी यंदा ‘पीएमपी’लाही लाभदायी ठरली आहे. विशेष म्हणजे दिवाळीच्या या ७ दिवसांत दररोज सरासरी १ कोटी २९ लाख ४८ हजार ४८० रुपये याप्रमाणे एकूण ९ कोटी ६ लाख ३९ हजार ३५९ रुपयांचा महसूल प्राप्त झाला आहे. ही कमाई दि. ९ ते १५ नोव्हेंबर दरम्यानची आहे.

दरम्यान, पीएमपीमधून विना तिकीट प्रवास करणाऱ्या प्रवाशांची संख्या दरवर्षी नवा विक्रम नोंदवत आहे. ‘पीएमपी’ने दिवाळीत अशा फुकट्या प्रवाशांकडून दिवाळीच्या सात दिवसांत तब्बल १ लाख ४६ हजार रुपये दंड वसूल केला आहे.

मागील वर्षीच्या तुलनेत पीएमपीकडे यंदा ४२ टक्के अधिक महसूल जमा झाला आहे. २०२२ मध्ये महामंडळाला ६ कोटी ३५ लाख ८१ हजार ६९३ रुपये महसूल मिळाला होता. तसेच २०२१ मध्ये ५ कोटी ३४ लाख २४ हजार ६९१ कोटींचा महसूल मिळाला होता.

सात दिवसांत मिळालेला महसूल?

९ नोव्हेंबर - १,५६,११,९३५

१० नोव्हेंबर - १,३१,९९,६२९

११ नोव्हेंबर - १,२६,७५,९६५

१२ नोव्हेंबर - ९१,४०,५०७

१३- नोव्हेंबर - १,३१,५०,८४५

१४ नोव्हेंबर - १,२८,९१,५२४

१५ नोव्हेंबर - १,३९,६८,९४५