रिमोट कंट्रोलने चोरली ९८ लाखांची वीज, पुण्यात गुन्हा दाखल

रावेत पोलीस ठाण्यात गुन्हा दाखल

पुणे :महावितरणच्या भरारी पथकाने रावेतमध्ये रिमोट कंट्रोलच्या सहाय्याने वीजमीटरमध्ये फेरफार करून बांधकामासाठी वापरण्यात येत असलेली २ लाख ४ हजार २९२ युनिटची अर्थात ९८ लाख ८ हजार ४४० रुपयांची वीजचोरी उघडकीस आणली. याप्रकरणी बांधकाम व्यावसायिकाविरुद्ध रावेत पोलीस ठाण्यात गुन्हा दाखल करण्यात आला.

रावेत येथील रवी खिलुमन ओछानी या ग्राहकाकडील वीजमीटर व संचाची महावितरणच्या भरारी पथकाकडून तपासणी करण्यात आली. यामध्ये वीजमीटरमध्ये रिमोट कंट्रोलच्या सहाय्याने फेरफार करून इमारतीच्या बांधकामासाठी गेल्या १८ महिन्यांमध्ये २ लाख ४ हजार २९२ युनिटची म्हणजे ९८ लाख ८ हजार ४४० रुपयांची वीजचोरी केल्याचे आढळून आले. याप्रकरणी ओछानी विरुद्ध रावेत पोलीस ठाण्यात गुन्हा दाखल करण्यात आला.

ही वीजचोरी उघडकीस आणण्यासाठी भरारी पथकाचे उपकार्यकारी अभियंता अनिल कुराडे, सहायक सुरक्षा व अंमलबजावणी अधिकारी शुभांगी पतंगे व सहकाऱ्यांनी भाग घेतला.