पाषाण टेकडीवर महाविद्यालयीन युवतीला लुटले, चतु:श्रृंगी पोलिस ठाण्यात गुन्हा दाखल

संबंधित तरूणीच्या गळ्यातील ५० हजार रुपयांची सोनसाखळी भर दुपारी हिसकावून नेण्यात आल्याने, परिसरात भीतीचे वातावरण आहे....

पुणे : शहरात दिवसेंदिवस लुटमारीच्या घटनांमध्ये लक्षणीय वाढ होत आहे. दोनच दिवसांपूर्वी पिस्तुलाचा धाक दाखवत एका २५ वर्षीय तरूणाला १२ जणांची लुटल्याची घटना घडली होती. याप्रकरणी हडपसर पोलिस ठाण्यात दरोड्याचा गुन्हा दाखल करून तपास गुन्हे शाखेकडे सोपवण्यात आला आहे. यानंतर आता २२ वर्षीय महाविद्यालयीन युवतीला पाषाण टेकडीवर दोघांनी लुटल्याची घटना घडली आहे. याप्रकरणी चतु:श्रृंगी पोलिस ठाण्यात गुन्हा दाखल करण्यात आला आहे. संबंधित तरूणीच्या गळ्यातील ५० हजार रुपयांची सोनसाखळी भर दुपारी हिसकावून नेण्यात आल्याने, परिसरात भीतीचे वातावरण आहे.

याप्रकरणी पोलिसांनी दिलेल्या माहितीनुसार, १० सप्टेंबर रविवार रोजी दुपारी तक्रारदार युवती आणि तिचे मित्र-मैत्रिण पाषाण-सूस रस्त्यावरील टेकडीवर फिरायला गेले होते. यावेळी दोन लुटारूंनी युवती आणि त्याच्या सोबत असलेल्या मित्र-मैत्रिणीला धमकावले. त्यानंतर तिच्या गळ्यातील ५० हजारांची सोन्याची चैन हिसकावून चोरटे पसार झाले. याप्रकरणाचा पुढील तपास सहायक पोलिस निरीक्षक पाटील करत आहेत. गेल्या काही दिवसांपासून पाषाण-सूस रस्त्यावरील टेकडीवर यापूर्वी देखील फिरायला गेलेल्या नागरिकांना चोरट्यांनी लुटल्याच्या घटना घडल्या आहेत, तसेच शहरातील विविध भागांमध्ये देखील या घटना घडत आहेत, त्यामुळे पोलिस प्रशासनासमोर या चोरट्यांनी आवाहन निर्माण केले आहे.