अल्पवयीन मुलाला खायला लावली कबुतराची विष्ठा

याबाबत पीडित मुलाच्या वडिलांनी भारती विद्यापीठ पोलिस ठाण्यात तक्रार दिली आहे.

पुणे : ढाबळीतील कबुतर घेतल्याच्या वादातून सराईत गुन्हेगाराने साथीदारांच्या मदतीने एका १२ वर्षांच्या मुलाचे अपहरण करून त्याला कबुतराची विष्ठा खायला लावल्याचा धक्कादायक प्रकार समोर आला आहे.

याबाबत पीडित मुलाच्या वडिलांनी भारती विद्यापीठ पोलिस ठाण्यात तक्रार दिली आहे. त्यानुसार पोलिसांनी सराईत गुन्हेगार अमोल आडम याच्यासह चौघांवर गुन्हा दाखल केला असून, दोन अल्पवयीन मुलांना ताब्यात घेतले आहे. आरोपींनी पाळलेल्यांपैकी एक कबुतर पीडित मुलाने आणले हाेते. 

आधी माजवली दहशत

मुलाने कबुतर नेल्याचे समजताच अमोल आडम हा त्याच्या तीन साथीदारांसह संतोषनगरमध्ये आला. त्यांनी हवेत हत्यारे फिरवून कोणी जर मध्ये आले, तर तोडून टाकीन, असे ओरडत दहशत निर्माण केली. 

ठार मारण्याची धमकी

सदर मुलाला अमोलने हाताने मारहाण केली व शिवीगाळ करून जीवे मारण्याची धमकी दिली. त्याला दुचाकीवर बसवून कात्रज येथील साई अपार्टमेंट येथे नेले. तेथे त्याला कबुतराची विष्ठा खायला लावली.