पिंपरीतील लॉजमध्ये धक्कादायक घटना; प्रेयसीवर वार करून तरुणाने संपवलं जीवन!

प्रियकराने प्रेयसीवर नक्की कोणत्या कारणासाठी हल्ला केला, हे अद्याप स्पष्ट झालेले नाही.

नारायण बडगुजर, लोकमत न्यूज नेटवर्क, पिंपरी : प्रेयसीवर चाकूने हल्ला करत प्रियकराने स्वतः गळफास घेतल्याची धक्कादायक घटना गुरुवारी (दि. १०) दुपारी चार वाजता पिंपरीतील एका लॉजमध्ये घडली. प्रियकराने प्रेयसीवर नक्की कोणत्या कारणासाठी हल्ला केला, हे अद्याप स्पष्ट झालेले नाही.

नीतेश नरेश मिनेकर (३४, रा. येरवडा) असे प्रियकराचे नाव आहे. पोलिसांनी दिलेल्या माहितीनुसार, नीतेश हा २८ वर्षीय तरुणीसोबत गुरुवारी दुपारी चारच्या सुमारास पिंपरीतील एका हॉटेलमध्ये आले. त्यांनी आधारकार्ड दाखवून एक खोली घेतली. त्यानंतर काही मिनिटांतच खोलीमधून तरुणीच्या ओरडण्याचा आवाज आला. त्यामुळे हॉटेलमधील कर्मचारी पळत खोली समोर गेले. त्यांनी दरवाजा उघडण्याची विनंती केली. मात्र, कोणीही खोलीचा दरवाजा उघडला नाही. 

कर्मचाऱ्यांनी तातडीने डायल ११२ क्रमांकावरून पोलिसांना माहिती दिली. त्यानंतर पोलिसांनी घटनास्थळी धाव घेतली. त्यांनी, दरवाजा वाजवत, आम्ही पोलिस आहोत, दरवाजा उघडा, असे सांगितले. त्यानंतर नीतेश याने, पाच मिनिट थांबा, उघडतो दरवाजा, असे सांगितले. मात्र, काही वेळ जाऊनही दरवाजा न उघडल्याने पोलिसांनी दरवाजा तोडला. नीतेशने पंख्याला गळफास घेतल्याचे पोलिसांच्या निदर्शनास आले. तर, तरुणी रक्ताच्या थारोळ्यात पडलेली होती. पोलिसांनी तातडीने तरुणीला रुग्णालयात दाखल केले.

नीतेश याने तरुणीवर हल्ला का केला, तसेच स्वत: गळफास का घेतला, याबाबत पोलिसांकडून चौकशी सुरू आहे. याप्रकरणी रात्री उशिरापर्यंत पिंपरी पोलिस ठाण्यात गुन्हा दाखल करण्याचे काम सुरू होते.