बारा वर्षीय मुलगी गर्भवती राहिली अन् आईच्या मित्राचे खरे रूप समोर आले

तरुणाने पीडित मुलीवर 3 ते 4 वेळा बलात्कार केल्याचे उघड

पुणे प्रतिनिधी/किरण शिंदे : बारा वर्षे दोन महिने वयाची अल्पवयीन मुलगी 22 आठवड्यांची गर्भवती राहिल्यानंतर तिच्या आईच्या ओळखीच्या व्यक्तीचे खरे रूप समोर आले. आईच्या ओळखीचा व्यक्ती असलेल्या या तरुणाने पीडित मुलीवर 3 ते 4 वेळा बलात्कार केल्याचे उघड झाले आहे. कोंढवा पोलीस ठाण्यात याप्रकरणी गुन्हा दाखल करण्यात आला आहे. 

आलोक भस्मे (वय 30, रा. कात्रज, पुणे) असे गुन्हा दाखल करण्यात आलेल्या आरोपीचे नाव आहे. मुलीच्या 28 वर्षीय आईने याप्रकरणी तक्रार दिली आहे. विशेष म्हणजे आरोपीचे पूर्ण नाव आणि पूर्ण पत्ता कोणालाच माहित नाही. मे ते जून 2022 या कालावधीत आरोपीच्या राहत्या घरात ही कृत्य केले. 

याप्रकरणी अधिक माहिती अशी की, फिर्यादी आणि आरोपी एकमेकांच्या ओळखीचे आहेत. याच ओळखीचा फायदा आरोपीने घेतला. फिर्यादी यांची मुलगी अल्पवयीन आहे हे माहीत असतानाही आरोपी तिला खाऊ देण्याचे आमिष दाखवून राहत्या घरी घेऊन गेला. त्यानंतर तिचा विरोध झुगारून तीन ते चार वेळेस तिच्यासोबत शारीरिक संबंध ठेवले. या सर्व प्रकारातून पीडित मुलगी 22 आठवड्यांची गर्भवती राहिली. दरम्यान पीडित मुलगी ससून रुग्णालयात दाखल असून ती 22 आठवड्यांची गर्भवती असल्याची माहिती पोलिसांना मिळाली होती. त्यानंतर पोलिसांनी या प्रकरणी गुन्हा दाखल केला असून अधिक तपास सुरू आहे.