मामेबहिणीला चिडविल्याचा जाब विचारणाऱ्या तरुणावर वार

लक्ष्मीनगरमधील एका १७ वर्षांच्या तरुणाने दत्तवाडी पोलीस ठाण्यात फिर्याद दिली

पुणे : मामेबहिणीला चिडविल्याचा जाब विचारल्याच्या कारणावरून तिघांनी तरुणावर वार करून त्याला जीवे मारण्याचा प्रयत्न केला. याप्रकरणी लक्ष्मीनगरमधील एका १७ वर्षांच्या तरुणाने दत्तवाडी पोलीस ठाण्यात फिर्याद दिली आहे. त्यावरून पोलिसांनी सचिन उर्फ सॅन्डी नवगिरे, गणेश आणि सॅन्डीच्या मित्रावर गुन्हा दाखल केला आहे.

फिर्यादीच्या मामाच्या मुलीला सचिन नवगिरे याने महिन्यापूर्वी चिडविले होते. त्याचा जाब फिर्यादीने विचारल्याने “मी कोण आहे माहीत आहे का?, तुला बघून घेतो व मी कोण आहे तुला दाखवतो,” अशी धमकी दिली होती. फिर्यादी व त्याच्या मावस भावासह १६ जुलै रोजी रात्री पावणेबारा वाजता आंबेडकर वसाहतीत बसला असताना तिघे जण आले. सचिन नवगिरे याने शिवीगाळ करून येथे काय करतो असे म्हटल्याने फिर्यादी तेथून निघून जाऊ लागला. तेव्हा सचिन याने धारदार शस्त्राने त्याच्या पायावर वार केला. मानेवर वार करून गंभीर जखमी केले. इतरांनी लाथाबुक्क्यांनी मारहाण केली. पोलीस उपनिरीक्षक निकाळजे तपास करीत आहेत.