टिंडरवरील ओळखीतून तरुणीवर बलात्कार, व्हिडिओ व्हायरल करण्याच्या धमकीने खंडणी उकळली

तरुणी आणि आरोपी यांची 2018 मध्ये टिंडर या डेटिंग ॲपच्या माध्यमातून ओळख झाली होती

पुणे/किरण शिंदे : टिंडर या डेटिंग ॲप वर ओळख झाल्यानंतर लग्नाचे आमिष दाखवून एका तरुणीवर बलात्कार करण्यात आला आहे. आरोपीने या तरुणीच्या नावावर वेगवेगळ्या बँकातून लोन काढत तिची आर्थिक फसवणूक ही केली. इतकेच नाही तर शारीरिक संबंधाचा व्हिडिओ व्हायरल करण्याची धमकी देऊन या तरुणीकडे खंडणी मागितल्याचाही प्रकार उघडकीस आला आहे. 

पीडित तरुणीच्या तक्रारीनंतर विमानतळ पोलिस ठाण्यात गुन्हा दाखल करण्यात आलाय. आकाश सक्सेना (वय 38, रा. रोहन मिथिला, हाऊस नं 19, विमाननगर) असे गुन्हा दाखल करण्यात आलेल्या आरोपीचे नाव आहे. 37 वर्षीय तरुणीने या प्रकरणी तक्रार दिली. 

याप्रकरणी अधिक माहिती अशी की, 2018 मध्ये फिर्यादी तरुणी आणि आरोपी यांची टिंडर या डेटिंग ॲपच्या माध्यमातून ओळख झाली होती. त्यानंतर आरोपीने फिर्यादी यांना लग्नाचे आमिष दाखवून त्यांच्यासोबत वेळोवेळी शारीरिक संबंध ठेवले. फिर्यादी तरुणीच्या इच्छेविरुद्ध तिच्यासोबत अनैसर्गिक संबंधही आरोपीने ठेवले. आरोपीने फिर्यादी यांच्या नावावर विविध बँकातून लोन ही काढले आहे. शारीरिक संबंधाचे व्हिडिओ व्हायरल करण्याची धमकी देऊन आरोपीने फिर्यादी यांच्याकडे चार लाख रुपयांची खंडणी मागितल्याचे तक्रारीत म्हटले आहे. विमानतळ पोलिसांनी याप्रकरणी गुन्हा दाखल केला असून अधिक तपास सुरू आहे.