लवळे फाटयावर अपघाताची पुनरावृत्ती सुरूच; ब्रेकफेल ट्रॅक मॉलच्या पार्किंगमध्ये घुसला

सुदैवाने उभ्या असलेल्या टँकर मध्ये अथवा पार्किंग मध्ये कोणीही उपस्थित नव्हते. त्यामुळे मोठी जीवित हानी टळली. 

मुळशी : पिरंगुट ता. मुळशी येथील लवळे फाट्यावर असलेल्या तीव्र उतारावर ब्रेक झालेल्या एका ट्रकने टँकरला उडवून अपघाताची पुनरावृत्ती सुरूच ठेवली आहे. सुदैवाने या अपघातात कोणतीही जीवित हानी झाली नाही. 

हा अपघात ता. 20 रोजी सकाळी 7.30 ते 8 च्या सुमारास पिरंगुट येथील अत्यन्त रहदारीच्या ठिकाणी घडला. सकाळची वेळ असल्याने अपघाताच्या ठीकानी यावेळी काही प्रमाणात वर्दळ कमी होती. याबाबत सविस्तर माहीती अशी की, पुण्याहून पिरंगुटच्या दिशेने येणारा मालवाहतूक ट्रॅक क्रमांक एम एच 46ए.आर 2090 हा पिरंगुट चा घाट उतरत असताना रस्त्याच्या उजव्या बाजूला उभ्या असलेल्या मड वाहतूक करणाऱ्या टँकर वर येऊन आदळला व पुढे एका मॉलच्या पार्किंमध्ये घुसला. सुदैवाने उभ्या असलेल्या टँकर मध्ये अथवा पार्किंग मध्ये कोणीही उपस्थित नव्हते. त्यामुळे मोठी जीवित हानी टळली. 

मागील वर्षी याच ठिकाणी अशाच पद्धतीने ब्रेक फेल झालेला सिमेंट विटाचा वाहतूक करणारा ट्रक पार्किंग मध्ये घुसून बऱ्याच वाहनाचे नुकसान केले होते. पुन्हा त्याच प्रकारचा अपघात होऊन पुनरावृत्ती घडली आहे. सदर अपघात ब्रेक फेल झाल्याने झाल्याचे चालकाने सांगितले आहे.ट्रक चा चालकाला पोलिसांनी ताब्यात घेतले असून पुढील तपास पौड पोलीस करीत आहेत.