ब्रेकअपनंतर प्रियकराने प्रेयसीच्या गालाचा घेतला चावा; तरुणावर गुन्हा दाखल

पुणे : प्रेमप्रकरणातील ब्रेकअपनंतर प्रियकराने प्रेयसीला शिवीगाळ करून, हाताने मारहाण करत गालाचा चावा घेतल्याची घटना समोर आली आहे. या प्रकरणी कोंढवा पोलिसांनी प्रियकरावर मारहाण करून विनयभंग केल्याचा गुन्हा दाखल केला आहे.

दानीश नायर (वय २२, रा.ससाणेनगर हडपसर) असे गुन्हा दाखल झालेल्या प्रियकर तरुणाचे नाव आहे. याबाबत २१ वर्षांच्या तरुणीने फिर्याद दिली आहे. हा प्रकार उंड्री, तसेच दोराबजी मॉल परिसरात ३१ मार्च रोजी घडला आहे.

पोलिसांनी दिलेल्या माहितीनुसार, फिर्यादी तरुणी व आरोपी तरुणामध्ये प्रेमसंबंध होते. त्यांच्यामध्ये सध्या ब्रेकअप झाले असून, त्यांच्यात वाद सुरू आहेत. ३१ मार्च रोजी दुपारी साडेबाराच्या सुमारास पुन्हा त्यांच्यात वाद झाला. यावेळी आरोपीने फिर्यादीला लाथाबुक्क्याने मारहाण करून शिवीगाळ केली, तसेच त्यांना पाहून घेण्याची धमकी देऊन मनास लज्जा निर्माण होईल, असे वर्तन केले. यावेळी तरुणाने फिर्यादीच्या गालाचा चाव घेऊन विनयभंग केल्याचे फिर्यादीत म्हटले आहे.