भाजपचा माजी नगरसेवक विवेक यादव याच्यावर आणखी एक गुन्हा

लोकमत न्यूज नेटवर्क

पुणे : आपल्यावर जीवघेणा हल्ला केलेल्याची सुपारी देऊन पिस्तुले पुरविलेल्या व मोक्काअंतर्गत कारवाई केलेला भाजपचा माजी नगरसेवक विवेक यादव याच्याविरुद्ध आणखी एक गुन्हा दाखल करण्यात आला आहे.

याप्रकरणी अकबर पिरसाब शेख (वय ३५, रा. पानसरेनगर, येवलेवाडी) यांनी लष्कर पोलीस ठाण्यात फिर्याद दिली आहे. त्यावरून पोलिसांनी विवेक यादव व त्याच्या ८ साथीदारांविरुद्ध गुन्हा दाखल केला. हा प्रकार कॅम्पमधील जान मोहम्मद स्ट्रीटवरील १५ ऑगस्ट चौकाजवळील कणसे गॅरेजसमोर ९ जानेवारी २०२० रोजी घडला होता.

शेख हा मोटारसायकलवरून जात असताना आरोपी मोटारसायकलवरून आले. त्यांनी शेख याला थांबवले. विवेक यादव याने त्यांना शिवीगाळ करून कोयता दाखवून विवेक भाईविरोधात अर्ज केला तर जिवंत सोडणार नाही, अशी धमकी दिली.

याबाबत फिर्यादी यांनी लष्कर पोलीस ठाणे व पोलीस आयुक्त कार्यालयात तक्रार केली. त्यानुसार पोलिसांनी फिर्यादी व आरोपी यांना समोरासमोर बोलावले होते. आरोपी समोर येण्यास घाबरल्याने त्यांनी तक्रार दिली नव्हती. आता पोलिसांनी कारवाई केल्यानंतर ते तक्रार देण्यास पुढे आले. पोलीस आयुक्त अमिताभ गुप्ता यांच्या आदेशावरून विवेक यादव याच्यावर पोलिसांनी मोक्काअंतर्गत कारवाई केली.