दौंड तालुका प्रशासनाची मनमानी, ऑक्सिजन पुरवठा बंद

उरुळी कांचन : कोरोना महामारीतील जीवघेण्या ऑक्सिजन तुटवड्याच्या भीषण परिस्थितीत दौंड तालुका प्रशासनाने यवत (ता. दौंड) येथील एका ऑक्सिजन उत्पादन करणाऱ्या प्लॅन्टमधून पूर्व हवेली तालुक्यात तसेच जिल्हातील इतर भागांत होणारा ऑक्सिजन पुरवठा मनमानी पद्धतीने (दि. २०) रात्री ८ पासून बंद करून मानवतेला काळिमा फासला आहे. दौंड तालुक्याच्या प्रशासनाच्या या भूमिकेने पूर्व हवेली तसेच जिल्हातील अनेक रुग्णालयांतील ऑक्सिजनचा पुरवठा १६ तासांहून अधिक काळ बंद राहिल्याने रुग्णालयात गोंधळ उडाला.

दौंड तालुक्यातील यवत येथे गुरुदत्त एंटरप्राइजेस नामक ६ टन क्षमतेचा ऑक्सिजन प्लॅन्ट आहे. या ऑक्सिजन प्लँटमधून पूर्व हवेली तालुक्यात तसेच जिल्ह्यांतील अनेक भागांत ऑक्सिजन पुरवठा सुरू आहे. मंगळवार (दि.२०) दौंड तालुका प्रशासनाने उर्वरीत भागातील पुरवठा बंद करुन केवळ दौंड तालुक्यातील सर्व रुग्णालयांतील ऑक्सिजनची कमरता बघता फक्त दौंड तालुक्यापुरता पुरवठा सुरू ठेवला आहे. या प्लॅन्टमधून संपूर्ण तालुक्याचा कोटा पूर्ण होईपर्यंत अघोषित आदेशच दौंड तालुका प्रशासनाने काढल्याने तब्बल १६ तासहून अधिक ऑक्सिजन पुरवठा (दुसऱ्या दिवशी ) म्हणजे बुधवार (दि.२१) पूर्व हवेली तालुक्यात खंडित झाला होता. १६ तासांहून अधिक काळ ऑक्सिजनच उपलब्ध न झाल्याने कोरोनाच्या महामारीत गंभीर अवस्थेत असलेल्या रुग्णांवर उपचार कसा करावा, असा प्रश्न सर्व रुग्णालयांपुढे आ वासून उभा राहिला आहे.

जिल्हा प्रशासनातील वरिष्ठ अधिकारी प्रवीण साळुंखे यांच्याशी संपर्क केला असता त्यांनी सांगितले की असे कोणीही करू शकत नाही, जिल्हाधिकारी यांनी याबाबत संबंधितांशी बोलून खात्री करण्याची सूचना केली आहे. त्यानुसार हवेलीचे अतिरिक्त तहसीलदार विजयकुमार चोबे यांना परिस्थितीचे अवलोकन करून पुरवठा सुरळीत करण्याबाबत सूचना दिल्या आहेत.

शिरूर हवेलीचे आमदार अशोक पवार यांनीही जिल्हाधिकारी, उपविभागीय अधिकारी, तहसीलदार यांना या गंभीर समस्येबाबत लक्ष घालून ऑक्सिजनचा पुरवठा लवकरात लवकर सुरळीत करण्याच्या सूचना दिल्या आहेत.

दौंड तालुक्यातील अनेक रुग्ण दौंडप्रमाणे हवेलीच्या उरुळी कांचन शहरात उपचार घेत आहेत. या ठिकाणी पुरवठा बंद ठेवून दौंडचा 'स्वाभिमान ' कमी होणार नाही का, असा प्रश्न उपस्थित होत आहे. दरम्यान, दौंड प्रशासनाच्या या भूमिकेवर हवेलीकर संतप्त झाले असून, पुढील काळात रेमडेसिविर व ऑक्सिजन उपलब्ध न झाल्यास जिल्हाधिकाऱी कार्यालयावर ठिय्या मांडू, असा इशारा भाजपचे युवा नेते अजिंक्य कांचन यांनी दिला आहे.

“दौंड तालुक्यातून हवेलीसाठी होणारा ऑक्सिजन पुरवठा मंगळवारी (दि.२०) रात्रीपासून बंद असल्याची बाब खरी आहे. जिल्हाधिकारी यांना याबाबत कल्पना दिली आहे. त्यांच्या सूचनेनुसार हवेली तालुक्यातील अधिकाऱ्यांचे पथक घेऊन मी स्वतः या ऑक्सिजन प्लॅन्टमध्ये जाऊन पुरवठा सुरळीत करणार आहे. पुढील काही तासांतच तालुक्यातील पुरवठा सुरळीत होईल.” - विजयकुमार चौबे, अतिरिक्त तहसीलदार, हवेली