जुन्या भांडणाच्या कारणावरून पत्नीवर हल्ला

लोकमत न्यूज नेटवर्क

चाकण : जुन्या भांडणाच्या कारणावरून बेकायदेशीर जमाव जमवून शिवीगाळ, दमदाटी करत दुकानदाराच्या पत्नीला जबर मारहाण करण्यात आल्याची घटना संतोषनगर, भाम (ता. खेड) येथील कर्ण सुपर मार्केट दुकानासमोर गुरुवारी (दि.९) १० च्या सुमारास घडली. या प्रकरणी चाकण पोलिसांनी शिरोली येथील दहा हल्लेखोरांवर गुन्हा दाखल केला.

गुलाब बाबूराव कड (वय ५७, रा. संतोषनगर, भाम, ता. खेड) यांनी याप्रकरणी फिर्याद दिली. त्यांची पत्नी (नाव समजले नाही) या हल्ल्यात गंभीर जखमी झाल्या आहेत. कड यांच्या फिर्यादी वरून वैभव शिवेकर, प्रमोद सावंत, विनायक सावंत, गुलाब शिवेकर, कुमार शिवेकर, अक्षय शिवेकर, सोमनाथ सावंत, गुलाब शिवेकर यांची पत्नी (नाव समजले नाही.) व अन्य अनोळखी दोन महिलांवर गुन्हा दाखल करण्यात आला आहे. गुलाब कड यांचे संतोषनगर, भाम येथे कर्ण सुपर मार्केट नावाचे दुकान आहे. जुन्या भांडणाच्या कारणावरून गुरुवारी १०.३० च्या दरम्यान वरील लोकांनी दुकानाच्या समोर येवून बेकायदेशीरपणे जमाव जमवून राडा केला.

वैभव शिवेकर याने यावेळी गुलाब कड यांच्या पत्नीस शिवीगाळ दमदाटी करत लाकडी दांडक्याने जबर मारहाण केली. तर प्रमोद सावंत याने हातातील लोखंडी गजाने मारहाण करून गंभीर जखमी केले. घटनास्थळावर जमावात सहभागी असलेल्या शिरोलीतील अन्य लोकांनी संबंधित महिलेला शिवीगाळ, दमदाटी करत हाताने व लाथाबुक्क्यांनी बेदम मारहाण केली.