पैशाच्या व्यवहारातून खुनाचा प्रयत्न

लोकमत न्यूज नेटवर्क

पुणे : पैशाच्या व्यवहारातून एकावर कोयत्याने वार करून त्याच्या खुनाचा प्रयत्न केल्याप्रकरणी डेक्कन पोलिसांनी एकाला अटक केली आहे.

प्रवीण शंकर कडू (वय २७, रा. सिंहगड रोड) असे अटक केलेल्याचे नाव आहे. इंद्रनील चंद्रभूषण मिश्रा (वय ४०) असे जखमी झालेल्याचे नाव आहे.

याप्रकरणी मंगला मिश्रा (वय ६७, रा. खिलारेवाडी) यांनी डेक्कन पोलिसांकडे फिर्याद दिली आहे. ही घटना एरंडवणा येथील खिलारेवाडीमध्ये सोमवारी रात्री सव्वाआठ वाजता घडली.

मिश्रा यांचा मुलगा इंद्रनील याने आरोपी प्रवीण कडू याच्याकडे काही दिवसांपूर्वी उसने पैसे घेतले होते. त्यातून त्यांच्यात वाद झाला होता. इंद्रनील हा मारुती साठे चौकात असताना प्रवीण कडू याने शिवीगाळ करून कोयत्याने इंद्रनील याच्या अंगावर ठिकठिकाणी वार करून गंभीर जखमी केले. पोलिसांनी खुनाचा प्रयत्न केल्याचा गुन्हा दाखल करून कडू याला अटक केली आहे.