भांडणे सोडविल्याच्या रागातून डोक्यात कोयता, बिअरची बाटली मारुन खुनाचा प्रयत्न; पुण्यातील घटना

चतु:श्रृंगी पोलिसांनी तिघांविरुद्ध खुनाचा प्रयत्न केल्याचा गुन्हा दाखल..

ठळक मुद्देगर्व्हमेंट पॉलिटेक्निक ग्राऊंडवरील घटना : तिघांविरुद्ध गुन्हा दाखल

पुणे : भांडणे सोडविल्याच्या रागातून तिघा जणांनी तरुणाच्या डोक्यात कोयत्याने वार करुन तसेच बिअरची बाटली मारुन गंभीर जखमी केले. याप्रकरणी चतु:श्रृंगी पोलिसांनी तिघांविरुद्ध खुनाचा प्रयत्न केल्याचा गुन्हा दाखल केला आहे.

रोहित कुऱ्हाडे, जयेश लोखंडे, साहिल रजपूत अशी गुन्हा दाखल झालेल्यांची नावे आहेत. याप्रकरणी सचिन यल्लाप्पा बनपट्टे (वय ३४,रा. वडारवाडी) यांनी चतु:श्रृंगी पोलिसांकडे फिर्याद दिली आहे. सचिन बनपट्टे हे त्यांचा मित्र अनु कांबळे यास भेटण्यासाठी गर्व्हेमेंट पॉलिटेक्निक ग्राऊंडवर रविवारी दुपारी भेटण्यासाठी जात होते. यावेळी सचिन यांच्या ओळखीचे विजय विटकर यांना रोहित कुऱ्हाडे यांनी कानाखाली मारली. त्यावेळी त्यांनी भांडणे सोडविली. सचिन बनपट्टे हे मैदानात बोलत थांबले असताना रोहित व त्याचे मित्र तेथे पुन्हा आले. रोहित याने पाठीमागून येऊन सचिन यांच्या डोक्यात कोयत्याने वार केला. तसेच क्रिकेटच्या बॅटने मारुन जखमी केले. तसेच सचिन यांचा मित्र तुषार आलकुंटे यांना बिअरची बाटली मारुन गंभीर जखमी केले. पोलीस उपनिरीक्षक भोसले अधिक तपास करीत आहेत.