पसार झालेल्या गुन्हेगाराचा आत्महत्येचा प्रयत्न

लोकमत न्यूज नेटवर्क

पुणे : घरफोडी, लुटमार असे गंभीर गुन्हे दाखल असलेल्या चोरट्याला पकडण्यासाठी गेलेल्या पोलिसांना गुंगारा देऊन पळून गेलेला चोरटा गाडी स्लिप झाल्याने पोलिसांच्या हाती लागला. आपल्याला पकडू नये, म्हणून त्याने ब्लेड आणि चाकूने स्वत:वर वार करून आत्महत्येचा प्रयत्न केला.

बबलूसिंग प्रभूसिंग टाक (वय ३०) असे आत्महत्येचा प्रयत्न करणाऱ्या चोरट्याचे नाव आहे. पोलीस नाईक अमित साळुंखे यांनी यासंदर्भात लोणी काळभोर पोलीस ठाण्यात फिर्याद दिली आहे. टाकविरोधात घरफोडी, लूटमार असे गुन्हे दाखल आहेत. तो उरुळी देवाची परिसरात राहत असल्याची माहिती तपास पथकाला मिळाली होती. त्यानंतर पहाटे पाचच्या सुमारास पोलिसांनी त्याला पकडण्यासाठी घराजवळ सापळा लावला. पोलीस आल्याची कुणकुण लागल्याने टाक अंधारात पसार झाला. दुचाकीवरून पसार झालेल्या टाकला पकडण्यासाठी पोलिसांनी पाठलाग सुरू केला.

काही अंतरावर त्याची दुचाकी घसरली. टाकने त्याच्याकडील चाकू तसेच ब्लेडने स्वत:वर वार केले. जखमी अवस्थेतील टाकला पोलिसांनी ताब्यात घेतले. त्याच्यावर रुग्णालयात उपचार सुरू असून उपनिरीक्षक शिंदे तपास करत आहेत.