पुण्यात हॉटेल चालकाकडून खंडणी वसूल करणाऱ्या पोलीस उपनिरीक्षकाला जामीन

हॉटेल बंद करा अन्यथा हॉटेलवर कारवाई करेन अशी धमकी देत मुंढव्यातील तीन हॉटेल चालकांकडून खंडणी वसूल केली होती

ठळक मुद्देसाक्षीदारांवर दबाव न टाकणे आणि पोलीस स्टेशनला बोलावतील तेव्हा हजेरी लावणे या अटींवर जामीन मंजूर

पुणे : ताबडतोब हॉटेल बंद करा अन्यथा हॉटेलवर कारवाई करेन अशी धमकी देत मुंढव्यातील तीन हॉटेल चालकांकडून खंडणी वसूल केल्याप्रकरणी अटक करण्यात आलेल्या पोलीस उपनिरीक्षकाला प्रथमवर्ग न्यायदंडाधिकारी ए.एस. देशपांडे यांनी जामीन मंजूर केला.

मिलन शंतनू कुरकुटे असे पोलीस उपनिरीक्षकाचे नाव आहे. हॉटेल मँनेजर मारूती कोंडिबा गोरे यांनी फिर्याद दिली आहे. हिंजवडी पोलीस ठाण्यात नियुक्तीला असलेला कुरकुृटे हा २१ ऑगस्ट पासून वैैद्यकीय कारणास्तव रजेवर होता. मंगळवारी रात्री पोलीस गणवेशात स्वत:च्या चारचाकी गाडीतून मुंढव्यातील एका हॉटेलमध्ये गेला. हॉटेल ताबडतोब बंद करा अन्यथा कारवाई करेन अशी धमकी गोरे यांना दिली. कारवाई व्हायची नसेल तर दोन हजार द्या सांगितले आणि जबरदस्तीने दोन हजार रूपये त्यांच्याकडून घेतले. त्यानंतर हॉटेल वन लॉज आणि एबीसी रस्त्यावरील हॉटेल कार्निव्हल अशा आणखी दोन हॉटेलच्या मँनेजरकडून अनुक्रमे दोन आणि तीन हजार रूपये अशी एकूण ७ हजार रूपयांची खंडणी कुरकुटे याने घेतली असे फिर्यादीत नमूद करण्यात आले आहे. 

साक्षीदारांवर दबाव न टाकणे आणि पोलीस स्टेशनला बोलावतील तेव्हा हजेरी लावणे या अटींवर जामीन मंजूर 

कुरकुटे याला शुक्रवारपर्यंत पोलीस कोठडी सुनावण्यात आली होती. त्याला न्यायालयात हजर करण्यात आले. कुरकुटे याने जामिनासाठी अँड अमेय डांगे यांच्यामार्फत अर्ज केला होता. मात्र सरकारी वकिलांनी जामिनास विरोध करीत गुन्हयातील आरोपीविरूद्ध सबळ पुरावा गोळा करून दोषारोपपत्र न्यायालयात दाखल करणे आहे असे सांगून न्यायालयीन कोठडीची मागणी केली. मात्र अँड डांगे यांनी आरोपी पोलिसाकडून गणवेश, कार आणि रक्कम असा मुद्देमाल जप्त करण्यात आला आहे. आरोपी पोलीस तपासास सहकार्य करण्यास तयार आहे. याप्रकरणी दाखल गुन्हयासाठी जास्तीत जास्त ३ वर्षांची शिक्षा आहे. असा युक्तिवाद केला. त्यावर न्यायालयाने साक्षीदारांवर दबाव न टाकणे आणि पोलीस स्टेशनला बोलावतील तेव्हा हजेरी लावणे या अटींवर कुरकुटे याला जामीन मंजूर करण्यात आला आहे.