विजेचा शॉक लागून बापलेकाचा मृत्यू

लोकमत न्यूज नेटवर्क

वडगाव कांदळी : बोरी खुर्द (ता. जुन्नर) येथे कमलजामातानगरमध्ये शेतामध्ये उसाला औषधफवारणी करत असताना विजेचा शॉक लागून बाप आणि मुलाचा मृत्यू झाला. रविवारी (दि.२५) दुपारी सव्वाबारा वाजण्याच्या सुमारास ही दुर्दैवी घटना घडली.

यादव भीमाजी पटाडे (वय ७०) व त्यांचा मुलगा श्रीकांत यादव पटाडे (वय ३७) असे मृत्युमुखी पडलेल्या बापलेकाची नावे आहेत. हे दोघेजण उसाच्या शेतामध्ये तणनाशकाची फवारणी करत होते. त्यांच्या शेतामध्ये गेली तीन ते चार वर्षांपासून बंद पडलेल्या विद्युतवाहिनीच्या तारा होत्या. वादळामुळे खांब पडल्यामुळे या तारा शेतामध्ये तशाच पडून होत्या. पडलेल्या तारांमध्ये विद्युतप्रवाह सुरू नसायचा. परंतु अचानकपणे विद्युतप्रवाह सुरू झाला. यावेळी फवारणी करणाऱ्या यादव पटाडे व श्रीकांत पटाडे यांना विजेचा जोरदार धक्का बसल्याने त्यांचा मृत्यू झाला. पटाडे पितापुत्राच्या मृत्यूस महावितरण जबाबदार असल्याचा आरोप बोरी खुर्द ग्रामस्थांनी केला आहे. गेली तीन ते चार वर्षांपासून बंद असणारी विद्युतपुरवठा करणारी लाईन बंद होती. तिच्या तारा तशाच खाली पडून होत्या. याबाबत अनेक वेळा ग्रामस्थांनी तक्रारी करूनही या तारा महावितरणने हटवल्या नाहीत. वेळीच या तारा महावितरणने काढल्या असत्या तर ही दुर्घटना टळली असती.

चौकट

अनेक ठिकाणी धोकादायक तारा

महावितरणच्या विद्युतपुरवठा करणाऱ्या अनेक तारा या धोकादायक आहेत. अनेक ठिकाणी खांब वाकलेले आहेत. तारा धोकादायक लोंबकळलेल्या आहेत. या तारांची व विद्युतखांबांची महावितरणने दुरुस्ती करणे गरजेचे आहे. अनेक ठिकाणचे विद्युत रोहित्रेही धोकादायक झाले आहेत. त्यांच्या केबल अतिशय खराब, आवरनविरहित आहेत. भविष्यातील असे अपघात टाळण्यासाठी महावितरणने याची दखल घेऊन तत्काळ दुरुस्ती करणे गरजेचे आहे.