घोड्यांच्या शर्यतीवर बेटींग, २७ बुकींना अटक

लोकमत न्यूज नेटवर्क

पुणे : रेसकाेर्स येथील घोड्यांच्या शर्यतीवर बेकायदेशीरपणे ‘बेटिंग’ घेणाऱ्यांवर पुणे पोलिसांनी कारवाई केली असून चार ठिकाणी एकाचवेळी छापे घालण्यात आले. त्यात २७ बडे ‘बुकी’ तसेच खेळायला येणाऱ्यांवर कारवाई करुन त्यांना अटक करण्यात आली. शहराच्या विविध भागात शनिवारी (दि. १२) पहाटेपर्यंत ही कारवाई सुरु होती. याप्रकरणी वानवडी, कोंढवा, हडपसर पोलीस ठाण्यात गुन्हे दाखल करण्यात आले आहेत.

याप्रकरणी विमानतळ पोलीस ठाण्याचे वरिष्ठ पोलीस निरीक्षक गजानन पवार यांनी वानवडी पोलीस ठाण्यात फिर्याद दिली आहे. त्यानुसार शब्बीर मोहसीन खंबाटी (वय ७०, रा. पदमव्हिला सोसायटी, वानवडी) यांना अटक केली आहे. सध्या मुंबईतील रेसकोर्सवर कोराेना केंद्र केल्याने तेथील शर्यती पुण्यात होत आहेत. रेसकार्समध्ये शासनाचा परवाना घेऊन त्यांचा सर्व कर भरुन बेटिंग घेणाऱ्यांना परवाना दिला जातो. त्याशिवाय किक्रेटप्रमाणे टीव्हीवर शर्यती पाहून बेटिंग घेतले जात होते. घोड्यांच्या नावाने बेटिंग घेत होते. या बंगल्यातून पोलिसांनी बेटिंगसाठी वापरलेले साहित्य आणि मोबाईल असा ५१ हजार रुपयांचा ऐवज जप्त केला आहे.

घोरपडी येथील महालक्ष्मी मंदिराजवळील डोबरबाडी येथील मोकळ्या मैदानात शुक्रवारी दुपारी बेकायदेशीरपणे बेटिंग घेण्यात येत होते. येथे पोलिसांनी छापा घालून बेटिंग घेणाऱ्या व खेळणाऱ्या अशा २० जणांना अटक केली आहे. तन्मय वाघमारे हा त्याच्याकडे असलेल्या मोबाईलमध्ये दुसऱ्याच्या नावाचे सीमकार्ड वापरून सीमकार्डधारकाची फसवणुक करुन बेटिंग घेताना मिळून आला.

यात अनेक बड्या असामीचा समावेश आहे. याबरोबरच हडपसर तसेच कोंढवा येथे छापा घालून बेटिंग घेणाऱ्यांना अटक केली आहे. बेकायदेशीरपणे बेटिंग घेणाऱ्या व खेळणाऱ्या मोठ्या रॅकेटवर ही इतक्या मोठ्या प्रमाणावर पुण्यात प्रथमच कारवाई करण्यात आली आहे.