भाजपाची छत्री दुरुस्तीसाठी काँग्रेस भवनात

पुणे: काँग्रेस भवनमध्ये शहर काँग्रेसने सुरू केलेल्या ''विनामूल्य छत्री दुरूस्ती'' उपक्रमावरून बरीच राजकीय खिल्ली उडवली गेली, पण या केंद्रात भारतीय जनता पार्टीचा शिक्का असलेली एक तुटकी छत्री शुक्रवारी दुरुस्तीला आली आणि काँग्रेसच्या कार्यकर्त्यांनी तोच क्षण साधून सगळ्या टवाळीची भरपाई केली.

काँग्रेसच्या विनामूल्य छत्री दुरुस्तीची समाजमाध्यमांवर गेले काही दिवस बरीच टर उडवली जात आहे. ''७० वर्षांच्या कारभारानंतर आलेली वेळ'', ''आता भाजपाची काही धडगत नाही'' अशा आशयाच्या पोस्ट केल्या गेल्या. त्यात अर्थातच भाजप समर्थक आघाडीवर होते.

पण शुक्रवारी या केंद्रात एका नागरिकाने भाजपाचे पुण्यातील खासदार गिरीश बापट यांचे नाव असलेली एक तुटकी छत्री दुरुस्तीला म्हणून आणून दिली. तिची रंगसंगती भाजपाच्या झेंड्याप्रमाणे आहे. त्यावर कमळाचे चिन्हही आहे. शनिवारपेठेतील एका आजोबांनी ती आणून दिली व दुरुस्त करून मागितली. काँग्रेसच्या सोशल मिडिया आघाडीचे प्रमुख चैतन्य पुरंदरे यांच्या नजरेस ती पडली व त्यांनी लगेचच हा क्षण आपल्या मोबाईलमध्ये टिपला. त्यानंतर मग हे छायाचित्र समाजमाध्यमांवर दिवसभर फिरत होते.

छत्री दुरुस्त करणारे रोहिदास कांबळे यांनी सांगितले की छत्रीच्या काड्या तुटल्या होत्या. कापड साधे असल्याने विरले आहे. बहुधा ती वाटपातील असावी. मी ती दुरुस्त करून दिली.