आर्थिक संकटात सापडलेल्या महापालिकेला 'बूस्टर' ; इतिहासात प्रथमच तेराशे कोटींचा कर जमा

नऊ महिन्याच्या कालावधीत सुमारे ७ लाख २९ हजार १७३ मिळकतधारकांनी १ हजार ३०१ कोटी २५ लाख रूपये मिळकतकर भरला आहे.

पुणे : कोरोना आपत्तीमुळे आर्थिक संकटात सापडलेल्या पुणे महापालिकेला, मिळकतकर आकारणी विभागाने मोठा बुस्टर दिला आहे. महापालिकेच्या इतिहासात प्रथमच आर्थिक वर्षाच्या पहिल्या नऊ महिन्यातच तब्बल १ हजार ३०० कोटी रूपयांचे उत्पन्न या विभागाने मिळवून दिले आहे.

कर आकारणी व कर संकलन विभागाचे प्रमुख विलास कानडे यांनी दिलेल्या माहितीनुसार, गत आर्थिक वर्षात म्हणजे सन २०१९-२० मध्ये संपूर्ण वर्षात १ हजार २९२ कोटी रूपये मिळकत कर जमा झाला होता.मात्र यावर्षी पहिल्या नऊ महिन्यात म्हणजे ३१ डिसेंबर २०२० पर्यंतच तब्बल १ हजार ३०० कोटी रूपये मिळकतकर जमा झाला आहे. विशेष म्हणजे या आर्थिक वर्षाच्या सुरूवातीला सुमारे दीड महिना लॉकडाऊनमुळे कर भरणा केंद्रे बंद होती. तर या खात्यातील सर्व सेवकवर्ग पाच-सहा महिने कोरोना आपत्ती निवारण कामकाजात व्यस्त होते़  अशावेळी आॅनलाईन कर भरण्यासाठी केलेले आवाहन व मिळकत करावरील शास्तीतील (व्याज) सवलत देणारी राबविलेली ‘अभय योजना’ यामुळे आपत्ती काळातही पुणे महापालिकेला इतिहासात प्रथमच तेराशे कोटींचे उत्पन्न मिळाले आहे.

१ एप्रिल ते ३१ डिसेंबर,२०२० या नऊ महिन्याच्या कालावधीत सुमारे ७ लाख २९ हजार १७३ मिळकतधारकांनी १ हजार ३०१ कोटी २५ लाख रूपये मिळकतकर भरला आहे.यामध्ये ७६़२६ टक्के कर रक्कम ही आॅनलाईन जमा झाली आहे. मागील वर्षी पहिल्या नऊ महिन्यात १ हजार ९२ कोटी ८४ लाख रूपये मिळाले होते.

‘अभय योजने’तून २ आॅक्टोबर ते ३० नोव्हेंबर दरम्यान महापालिकेला ३५१ कोटी १८ लाख रूपयांचे उत्पन्न मिळाले असून, या योजनेला आता जानेवारी,२०२१ अखेरपर्यंत मुदतवाढ देण्यात आली असल्याने, १५ डिसेंबर ते ३१ डिसेंबर,२०२० या कालावधीत ७० कोटी २६ लाख मिळकत कर मिळाला असल्याचेही विलास कानडे यांनी सांगितले. 

-----------------------------------------