खूनप्रकरणी दोघांना भोसरीत अटक

भोसरी येथील अंकुशराव लांडगे नाट्यगृहाच्या पुढे काही अंतरावर असलेल्या झोपडीतील एकाचा डोक्यात दगड घालून खून करण्यात आला.

पिंपरी : भोसरी येथील अंकुशराव लांडगे नाट्यगृहाच्या पुढे काही अंतरावर असलेल्या झोपडीतील एकाचा डोक्यात दगड घालून खून करण्यात आला. ही घटना सोमवारी उघडकीस आली. दुसऱ्या दिवशी मंगळवारी दुपारी मृतदेहाची ओळख पटली असून, दोन आरोपीसुद्धा पोलिसांच्या हाती लागले आहेत. सोन्या उर्फ संतोष मधुकर (वय २०, भोसरी), विकी उर्फ विकास रामचंद्र सोमवंशी (वय १९, दिघी रोड, भोसरी) अशी आरोपींची नावे आहेत.
पोलिसांनी दिलेल्या माहितीनुसार, प्रदीप दिनकर कुटे (रा. भोसरी, मूळ गाव बीड) हा या परिसरात मजुरी करत असे. सोमवारी दोन जणांनी त्याचा मोबाईल चोरण्याचा प्रयत्न केला. परंतु, त्यांना मोबाईल हिसकावण्यात यश आले नाही. त्यातील एकाने काही झाले तरी तो माबाईल मिळवायचा असा निश्चय व्यक्त करून साथीदाराला घेऊन प्रदीपच्या मागावर गेला. त्याच परिसरात प्रदीप त्यांना दिसून आला. त्यांनी मोबाईल हिसकावण्याचा पुन्हा प्रयत्न केला. त्यांच्यात झटापट झाली. त्या वेळी आरोपींनी त्याला दगड मारले. दगडाचा मार लागल्याने तो कोसळला. मृत झाल्याचे लक्षात येताच, विल्हेवाट लावण्यासाठी त्यांनी मृतदेह ओढत नेला. झुडपात मृतदेह टाकून पुरावा नष्ट करण्याचा प्रयत्न केला. (प्रतिनिधी)