एकबोटेंना अटक न केल्यास आंदोलनाचा ब्रिगेडचा इशारा

पुणे : धार्मिक तेढ निर्माण करणारे वक्तव्य करणाऱ्या समस्त हिंदू आघाडीच्या मिलिंद एकबोटे यांच्यावर गुन्हा दाखल करण्यात आल्यानंतर अजूनही एकबोटे यांना पोलिसांनी अटक केलेली नाही. त्यांना जर १५ मार्चपर्यंत अटक केली नाही तर तीव्र आंदोलन केले जाईल, असा इशारा संभाजी ब्रिगेडचे जिल्हाध्यक्ष विशाल तुळवे यांनी दिला.

मंगळवारी (दि.९) पत्रकार परिषद घेऊन तुळवे यांनी ही मागणी केली. सतीश काळे, प्रमोदसिंह गोतारने, विजय जगताप, आय. टी. सय्यद, सचिन गोळे, रशीद सय्यद, तोसीफ शेख आदी यावेळी उपस्थित होते.

तुळवे म्हणाले की, एकबोटे नेहमीच अशी वक्तव्ये करून राजकीय फायदा मिळवितात. त्यांच्या वक्तव्यामुळे सामाजिक तेढ निर्माण होऊ शकते. जातीय दंगली घडू शकतात. मात्र बहुजन समाज त्यांच्या वक्तव्याला भुलणार नाही. पोलिसांनी एकबोटेंना तत्काळ अटक करावी. त्यांना जर ते सापडत नसतील तर आम्ही त्यांचा शोध घेऊन पोलिसांच्या हवाली करू. त्यांना फरारी घोषित करून संपत्ती जप्त करण्यात यावी.