दुर्दैवी! बहिणीच्या लग्नासाठी कपडे खरेदीसाठी गेलेल्या भावाचा भीषण अपघातात मृत्यू

भावाचा जागीच मृत्यू तर मित्र गंभीर जखमी...

नसरापूर (पुणे) : बहिणीच्या लग्नासाठी पुण्यामध्ये कपडे खरेदी करण्यासाठी निघालेल्या तरुणाचा पुणे-सातारा महामार्गावर केळवडे फाट्यावर झालेल्या अपघातात जागीच मृत्यू झाला. तर त्याचा मित्र जखमी झाला आहे. अजय रामचंद्र पिलावरे (वय २४, रा. शिंदेवाडी, ता. खंडाळा, सातारा) असे अपघातात मृत्यू झालेल्या तरुणाचे नाव असून, त्याचा मित्र गौरव हिरामण जाधव हा जखमी झाला आहे.

अजय पिलावरे याच्या बहिणीचे येत्या सहा जूनला लग्न असून, त्यानिमित्ताने स्वतःच्या व घरातील मंडळीचे कपडे खरेदी करण्यासाठी त्याचा मित्र गौरव समवेत ते पुण्याला दुचाकीने (क्र. एमएच ११ - सीएल ५२६५) जात होते. यावेळी गॅस टाकीने भरलेला ट्रक (क्र. एमएच ११ - सीएच ६९४२) महामार्गावरून जात असताना इंडिकेटर न लावता किंवा कोणतीही सूचक सूचना न देता ट्रक अचानक सेवा रस्त्याकडे वळविला. त्यावेळी पाठीमागून येणारी दुचाकी ट्रकच्या मधोमध जोरदार धडकली. यात अजयचा मृत्यू झाला, तर गौरव जखमी झाला. यावेळी प्रवास करणाऱ्या प्रवाशांनी जखमींना नसरापूर येथील सिद्धिविनायक हॉस्पिटलमध्ये उपचारासाठी नेले. मात्र, दोघांची प्रकृती गंभीर असल्याने पुणे येथील भारती हॉस्पिटलमध्ये उपचारासाठी नेत असताना यात अजय पिलावरे याचा मृत्यू झाला.

याबाबत अप्पासो मळेकर यांनी फिर्याद दिली असून, त्यानुसार राजगड पोलिसांनी ट्रक चालक सुरेंद्र शंकर जाधव (रा. तळदेव, महाबळेश्वर) याच्यावर गुन्हा दाखल केला आहे.