पुणे-सोलापूर मार्गावर बर्निंग बसचा थरार

कदमवाकवस्ती : लातूरवरून पुुुुुण्याला जाणाऱ्या एका खासगी ट्रॅव्हल्स बसचा टायर फुटल्याने बसने पेट घेतला. काही कळण्याच्या आत संपूर्ण बस आगीत भस्मसात झाली. बसमध्ये जवळपास २९ प्रवासी होते. चालकाच्या प्रसंगावधनामुळे ते वेळीच बस बाहेर पडल्याने त्यांचे प्राण वाचले. या घटनेमुळे प्रवाशांना काळ आला होता, पण वेळ नाही या म्हणीचा प्रत्यय आला. ही घटना शनिवारी सकाळी पुणे-सोलापूर महामार्गावर कदमवाकवस्ती जवळील वाकवस्तीजवळ येथे ८ च्या सुमारास घडली. अग्निशामक दलाला अर्ध्या तासानंतर आग विझवण्यास यश आले.

लातूर जिल्ह्यातील मुखेडहून पुण्याला जाण्यासाठी शुक्रवारी (दि. २५) सायंकाळी ७ च्या सुमारास स्वाती ट्रॅव्हल्सची बस पुण्याकडे रवाना झाली होती. यात ११ महिलांसह २९ प्रवासी होते. ही बस शनिवारी (दि २६) सकाळी ७ च्या सुमारास उरुळी कांचनजवळ बंद पडली. यावेळी बस चालक बाबूराव विनायक मुंडे यांच्या छोट्याशा प्रयत्नानंतर बस चालू झाली. ही बस लोणी काळभोरहून कदमवाकवस्ती ग्रामपंचायत हद्दीतील दत्त मंदिराजवळ येताच, बसचा उजव्या बाजूचा मागील टायर फुटला. टायर फुटताच टायरने पेट घेतला. टायरने पेटल्याचे लक्षात येताच चालकाने बस रस्त्याच्या बाजूला घेत बसमधील प्रवाशांना त्वरित खाली उतरवले. प्रवासी बसमधून उतरत असतानाच, बसनेही मागील बाजूने पेट घेतला. बसमधील प्रवाशी उतरले असले तरी, प्रवाशांचे खाण्यापिण्याचे साहित्य व सामान जळून खाक झाले. आगीची माहिती मिळताच, लोणी काळभोर पोलिसांसह वाघोली व हडपसर येथील अग्निशमन दलाचे पथक दाखल घटनास्थळी दाखल झाले. तब्बल अर्धा तासांच्या प्रयत्नानंतर त्यांनी आगीवर नियंत्रण मिळवले. लोणी काळभोरचे पोलीस निरीक्षक सूरज बंडगर,

महामार्ग पोलीसचे युवराज नांद्रे व त्यांच्या सहकाऱ्यांनी घटनास्थळी येऊऩ, बसमधील प्रवाशांना धीर देण्याबरोबरच प्रवाशांना त्यांच्या घऱी जाण्यासाठी मदत केली. पुढील तपास पोलीस उपनिरीक्षक संदीप बोरकर करीत आहेत.

चौकट

चालकामुळे वाचले २९ जणांचे प्राण

उरुळी कांचन येथे बस बंद पडल्यावर चालकाने ती दुरुस्त केली. ही बस कमवाकवस्ती हद्दीत आल्यावर बसचे चाक अचानक फुटल्याने टायरने पेट घेतला. ही बाब लक्षात येताच चालकाने त्यांना त्वरित खाली उतरवले. मात्र, प्रवासी उतरतानाच बसने मागच्या बाजूने पेट घेतला. जर वेळीच प्रवासी खाली उतरले नसते, तर मोठी जीवितहानी झाली असती. या दुर्घटनेत प्रवाशांच्या सामानाचे नुकसान झाले.

फोटो : आगीत भस्मसात झालेली ट्रॅव्हल बस.