Accident: शिरुरमध्ये नव्याने काम झालेल्या महामार्गावर बसचा अपघात; एकाचा दुर्दैवी मृत्यू

अपघात नेमका कसा झाला याबाबत माहिती मिळू शकली नाही

रांजणगाव सांडस : शिरसगाव काटा (तालुका शिरूर) येथे बसच्या अपघातात एकाचा जागीच दुर्दैवी मृत्यू झाल्याची घटना घडली. चाकण ते आढळगाव या रस्त्याचे नुकतेच काम झाल्यामुळे वाहन हा अपघात घडला.

याबाबत मिळालेल्या प्राथमिक माहितीनुसार, न्हावरा ते तांदळी दरम्यान नव्याने महामार्गाचे काम करण्यात आले आहे. या महामार्गावर शनिवार (दि.१९) रोजी रात्री साडे आठ च्या दरम्यान बिरा सतू गोरे यांना गावातील मुख्य चौकात बस ची धडक बसल्याने जागीच मृत्यू झाला. घटनेची माहिती कळताच मांडवगण फराटा पोलिसांनी घटनास्थळी धाव घेतली. रात्री उशिरापर्यंत पंचनामा सुरू होता. अपघात नेमका कसा झाला याबाबत माहिती मिळू शकली नाही. रात्री उशिरापर्यंत गुन्हा दाखल झालेला नव्हता. दरम्यान गावातच मुख्य चौकात अपघात झाल्याने बघ्यांची मोठी गर्दी झाली होती.अपघाताने गावातीलच व्यक्तीचा जागीच मृत्यू झाल्याने सर्वत्र हळहळ व्यक्त केली जात आहे.