बारामतीत भाजप कार्यालयाच्या फलकावर काळा रंग टाकल्याप्रकरणी गुन्हा दाखल

फलकावर काळा रंग टाकल्याची घटना....

बारामती : शहरातील भाजप कार्यालयाच्या फलकावर काळा रंग टाकल्याप्रकरणी दोघांवर गुन्हा दाखल करण्यात आला आहे. मंगळवारी (दि.१३) सकाळी हा प्रकार घडला. घटनेनंतर उपविभागीय पोलिस अधिकारी गणेश इंगळे यांनी या ठिकाणी भेट देऊन पाहणी केली.

पोलिस निरीक्षक सुनील महाडीक यांनी याबाबत माहिती दिली. त्यानुसार मंगळवारी (दि.१३) सकाळी सहा वाजता बारामती भाजप कार्यालयाच्या बाहेर रस्त्यालगत असणाऱ्या फलकावर व कार्यालयाच्या फलकावर काळा रंग टाकण्यात आला. रंग टाकतानाचा व्हिडीओ समाज माध्यमातून व्हायरल झाला आहे. पोलिसांनी तत्काळ या व्हिडीओमध्ये रंग टाकताना दिसणारे सचिन नानासो जगताप (३८) व कृष्णा सयाजी सोनवणे (५०) या दोघांना ताब्यात घेतले आहे. त्यांच्याकडे केलेल्या चौकशीत दोघांनी रंग टाकताना सचिन जगताप यांच्या कॅमेऱ्यामध्ये महादेव मिसाळ यांनी हा व्हिडीओ काढल्याचे सांगितले. हा व्हिडीओ काढून समाजमाध्यमांवर प्रसारीत केला.

फलकावर रंग टाकून व्हिडीओ काढून प्रसारित केला. त्यातून सार्वजनिक सुव्यवस्था बाधित करण्याचा प्रयत्न झाला. अशा प्रकारची कृती केल्याने संबंधितांविरुद्ध पोलिसांनी गुन्हा दाखल केलेला आहे. पोलिसांचा अधिक तपास सुरू असल्याचे पोलिस निरीक्षक महाडीक यांनी सांगितले.