Gram Panchayat Result Pune: गावात जल्लोष! खेड तालुक्यातील शेलगाव ग्रामपंचायतीवर पुन्हा राष्ट्रवादी

नवनिर्वाचित सरपंच व सदस्यांचा गुलाल - भंडाऱ्याची उधळण करत ग्रामपंचायत व ग्रामस्थांच्या वतीने फेटा बांधून सत्कार

भानुदास पऱ्हाड 

शेलपिंपळगाव : शेलगाव (ता.खेड) येथील ग्रामपंचायतीवर राष्ट्रवादी काँग्रेसचे आमदार दिलीप मोहिते - पाटील यांचे कट्टर समर्थक तथा खेड तालुका खरेदी विक्री संघाचे संचालक संतोष आवटे यांच्या पत्नी वैशाली आवटे यांनी प्रतिस्पर्धी उमेदवार सारिका गणेश झरेकर यांचा ६७ मतांनी पराभव करत मोठा विजय संपादन केला. 
          
शेलगाव ग्रामपंचायतीच्या एकूण सात सदस्य संख्या आहे. यांपैकी तीन उमेदवार यापूर्वी बिनविरोध निवडून देण्यात आले होते. उर्वरित चार जागांसाठी सात उमेदवार निवडणूक रिंगणात उभे होते. यामध्ये प्रभाग एकमधून सर्वसाधारण स्त्री गटातून उज्वला सुखदेव आवटे (१८९ मते), शुभांगी प्रमोद आवटे (१६४ मते), प्रभाग तीनमधून सर्वसाधारण गटातून राहुल मोहन आवटे (१८२ मते) व शारदा ज्ञानेश्वर आवटे १८३ मते मिळवून विजयी झाल्या आहेत. नवनिर्वाचित सरपंच व सदस्यांचा गुलाल - भंडाऱ्याची उधळण करत ग्रामपंचायत व ग्रामस्थांच्या वतीने फेटा बांधून सत्कार करण्यात आला.