कोरोनातून सावरलेल्या बालकांना ‘एमएसआयसी’चा धोका !

पुणे : कोरोनाची लागण झालेल्या मुलांमध्ये या आजारातून बाहेर पडल्यानंतर ‘मल्टिसिस्टीम इन्फ्लमेटरी सिंड्रोम’ (एमएसआयसी) हा आजार होत असल्याचे दिसून आले आहे. बऱ्याचदा कोरोनामुक्तीनंतर काही आठवड्यांनी या आजाराची लक्षणे जाणवतात.

पहिल्या लाटेपेक्षा दुसऱ्या लाटेत लहान मुलांना कोरोना संसर्ग जास्त झाला. लाट काहीशी ओसरत असताना कोरोना पश्चात आजार समोर येत आहेत. यापैकीच एक मल्टीसिस्टीम ‘इंफ्लमेटरी सिंड्रोम’ आहे.

बालरोगतज्ज्ञ डॉ. अंशु सेठी म्हणाल्या, “मल्टिसिस्टीम इन्फ्लमेटरी सिंड्रोम या आजारात तीव्र ताप येतो. वेळीच निदान न झाल्यास शरीरावर चट्टे उठणे, डायरिया, वारंवार शौचास होणे, चक्कर येणे, अशक्तपणा जाणवणे, श्वास घेता न येणे असा त्रास होऊ शकतो. याशिवाय कोरोनरी आर्टरीची समस्याही उद्भवू शकते. लहान मुलांना कावासाकी हा आजार होण्याची शक्यता असते. मुलांमध्ये याचे प्रमाण केवळ एक ते दोन टक्के इतकेच आहे. त्यामुळे कोरोनातून बरे झाल्यानंतर पालकांनी लहान मुलांच्या आरोग्याकडे विशेष लक्ष देणे गरजेचे आहे. हा आजार कोणत्याही वयोगटातील लहान मुलांमध्ये होऊ शकतो. ज्या मुलांना आधीपासून कोणताही आजार असल्यास अशा मुलांना धोका अधिक संभवतो. नवजात बालकांमध्ये हा आजार फारच दुर्मिळ आहे.”

बालरोगतज्ज्ञ डॉ. तुषार पारीख म्हणाले, “कोरोना होऊन गेल्यावर दोन ते पाच आठवड्यांनी या आजाराची लक्षणे दिसू लागतात. सहा वर्षाखालील मुलांच्या तुलनेत ६ ते १२ वर्षे वयोगटात या आजाराचे प्रमाण दुप्पट, आणि १२ ते १८ या वयोगटात अर्थात किशोरवयीन मुलांमध्ये हे प्रमाण सर्वात जास्त आहे. मध्यम स्वरूपाच्या आजारासाठी स्टेरॉइड्स दिली जातात, तीव्र स्वरूपाच्या आजारात इम्युनोग्लोब्युलिन हे औषध आणि इतर उपचार केले जातात.”

चौकट

कोरोनातून बरे झाल्यानंतर मुलांना काही आठवड्यानंतर तीव्र ताप येणे, श्वास घेण्यास अडचण येत असल्यास, भूक लागत नसेल तर तातडीने डॉक्टरांचा सल्ला घ्या. डॉक्टरांच्या सल्ल्यानुसार आवश्यक रक्ताची आणि कोविड अँटिबॉडी चाचणी करून घ्या. कोरोनामुक्तीनंतर लहान मुलांना कोणताही आजार होऊ नये, यासाठी रोगप्रतिकारशक्ती वाढविण्यासाठी आहारात योग्य तो बदल करा. मुलांच्या झोपेच्या वेळा, पौष्टिक आहार आणि नियमित व्यायामाकडे लक्ष द्या. सार्वजनिक ठिकाणी मुलांना फिरायला घेऊन जाणे शक्यतो टाळावे. कोरोना व्यतिरिक्त इतर आजारांचा संसर्ग टाळण्यासाठी मुलांना फ्लू लस देणे आवश्यक आहे.”

- डॉ. अंशु सेठी

चौकट

१ मार्च ते १६ जून या कालावधीत शहरात ० ते १८ वयोगटातील २६,४८८ मुलांना कोरोनाची बाधा झाली. शहरात सध्या २८४ मुले सक्रिय रुग्ण असून, ३६ जण ऑक्सिजनविरहित बेड, तर ८ जण ऑक्सिजन बेडवर उपचार घेत आहेत.

चौकट

ही आहेत लक्षणे

-खूप ताप येणे. तो पाच दिवसांपर्यंत कमी न होणे. मुलांच्या पोटात सतत दुखणे.

-मळमळ, उलट्या होणे, त्वचेवर ‘रॅशेस’ पडणे.

-डोळे लाल होणे.

चौकट

ही घ्या काळजी

-मुलांना मास्कशिवाय बाहेर पडू देऊ नका.

-कुठलेही लक्षण आढळल्यास तातडीने डॉक्टरांना दाखवा.

-कोरोनातून बरे झालेल्या मुलांकडेही लक्ष ठेवा.