दिलासा : दीड महिन्यांनतर प्रथमच सर्वात कमी रुग्णसंख्या

पुणे : पुण्यासाठी शुक्रवारचा दिवस दिलाशाचा ठरला असून, दीड महिन्यानंतर प्रथमच सर्वात कमी रुग्णसंख्या नोंदविली गेली आहे. पुण्यामध्ये आज २४५१ नवे रुग्ण सापडले. कोरोनावर मात करणाऱ्या रुग्णांची संख्या ३४९१ असून, नव्याने बाधितांपेक्षा एक हजाराने जास्त आहे. पुण्यामध्ये कोरोनाची दुसरी लाट १६ मार्चपासून सुरू झाली. एक ते ९ मार्चदरम्यान तीन आकडी असणारी रुग्णसंख्या १० मार्चपासून चार आकडी झाली. १५ मार्चनंतर रुग्णसंख्येने दोन हजारांचा आकडा ओलांडला. २३ मार्चनंतर दररोज तीन ते साडेतीन हजार रुग्ण सापडू लागले. २८ मार्चनंतर कोरोनाचा कहर वाढू लागला. दररोज चार हजार नवे रुग्ण आणि कोरोनामुक्त होणारे दोन हजारांच्या आसपासच असल्याने सक्रिय रुग्णांची संख्या मोठ्या प्रमाणात वाढली. ३ एप्रिलनंतर दैनंदिन रुग्णसंख्या पाच हजारांवर गेली. ८ एप्रिल रोजी सर्वाधिक सात हजार रुग्ण सापडले होते. संपूर्ण एप्रिल महिना रुग्णसंख्या साडेचार हजार ते सहा हजारांपर्यंत होती. मात्र, मेच्या पहिल्या आठवड्यात रुग्णसंख्या कमी होऊ लागली आहे. बाधितांच्या प्रमाणात बरे होणाऱ्यांचे प्रमाण वाढले आहे. १८ एप्रिलला ५६ हजारांवर गेलेली सक्रिय रुग्णसंख्या ७ मे रोजी सुमारे २० हजारांनी कमी होऊन ३८ हजार ४८१ झाली आहे.

नगर रोड- वडगाव शेरी, कोथरुड-बावधन वगळता

मे महिन्याचा पहिला आठवडा दिलासादायक

नगर रोड- वडगाव शेरी आणि कोथरुड-बावधन वगळता पुण्याच्या इतर भागांसाठी मे महिन्याचा पहिला आठवडा दिलासादायक ठरला आहे. एप्रिलच्या शेवटच्या आठवड्याच्या तुलनेत रुग्णसंख्या कमी झाली आहे.

प्रभाग २३ ते २८ एप्रिल २९ एप्रिल ते ५ मे

हडपसर- मुंढवा ४४७५ ३७०३

नगर रोड वडगावशेरी २८९७ ३०५२

सिंहगड रोड २७८१ २४३४

धनकवडी-सहकारनगर २५१७ २४०३

वारजे-कर्वेनगर २४८८ २३८५

कोथरुड-बावधन १९५६ २२५८

औंध-बाणेर २२५४ १८५१

येरवडा-कळस-धानोरी १५६९ १५०२

कोंढवा-येवलेवाडी १५५० १२३२

बिबवेवाडी ११८७ ११२६

ढोले पाटील रोड ८३६ ९२२

शिवाजीनगर-घोले रोड १०९१ ८७३

कसबा-विश्रामबागवाडा ९०३ ८६०

वानवडी-रामटेकडी १०२९ ८५२

भवानी पेठ ३९० ३९२