सदनिकेचे बुकिंग रद्द करूनही पैसे न दिल्याने कंपनीला दणका

लोकमत न्यूज नेटवर्क

पुणे : सदनिकेचे बुकिंग रद्द करूनही बुकिंगचे पैसे परत न करणाऱ्या एका कंपनीला अतिरिक्त जिल्हा ग्राहक तक्रार निवारण आयोगाने बुकिंगसाठी स्वीकारलेले १ लाख रुपये ९ ऑक्टोबर २०१९ पासून १० टक्के व्याजाने परत करावे. तसेच नुकसानभरपाईपोटी २५ हजार, तर तक्रारीच्या खर्चापोटी ३ हजार रुपये देण्यात यावे, असा आदेश दिला आहे.

याबाबत अभिजित बोराटे, भाग्यश्री बोराटे यांनी साहिल प्रॉपरटीज, प्रोपरायटर विरुद्ध अतिरिक्त जिल्हा ग्राहक तक्रार निवारण आयोगात तक्रार दाखल केली होती. त्यानुसार आयोगाचे अध्यक्ष जे. व्ही. देशमुख, सदस्य अनिल जवळेकर, शुभांगी दुनाखे यांनी हा आदेश दिला आहे.

तक्रारदारांना सदनिका खरेदी करण्याची असल्याने त्यांनी कंपनीला भेट देऊन ते विकसित करत असलेल्या प्रकल्पाविषयी माहिती घेतल्यानंतर तक्रारदारांनी एक सदनिका बुक केली. सदनिकेच्या बुकिंगच्यावेळी तक्रारदारांनी १ लाख रुपये भरले. त्यानंतर विरुद्ध पक्षाने तक्रारदारांना वेलकम लेटर दिले. बुकिंग केलेल्या दिनांकापासून अ‍ॅग्रीमेंट फॉर सेल करणे गरजेचे होते. मात्र, बराच कालावधी गेल्यावरदेखील विरुद्ध पक्षाने अ‍ॅग्रीमेंट फॉर सेल केले नाही.

वारंवार विनंती करून देखील तक्रारदारांना योग्य माहिती दिलेली नाही. त्यामुळे तक्रारदारांनी २६ मार्च २०१९ रोजी बुकिंग रद्द करून भरलेली रक्कम परत करण्याची विनंती केली. त्याबाबतचा ई-मेल देखील त्यांनी विरुद्धपक्षाला पाठवला. त्यानंतर २९ मार्च २०१९ रोजी विरुद्धपक्षाने बुकिंग केल्यावर १५ दिवसांच्या आत रद्द केल्यास कॅन्सलेशन पोटी ५१ हजार रुपयेची कपात करण्यात येईल असे सांगण्यात आले. त्यावर तक्रारदार यांनी कोणताही करार झालेला नसताना कपात करण्याचा प्रश्न येत नसल्याचे विरुद्धपक्षाला कळवले.

विनंती करूनही रक्कम न दिल्याने ग्राहक आयोगात धाव

दरम्यान, वारंवार विनंती करूनदेखील रक्कम परत मिळत नसल्याने तक्रारदारांनी ग्राहक आयोगात धाव घेत तक्रार दाखल केली. बुकिंगसाठी भरलेले १ लाख रुपये १८ टक्के व्याजाने मिळावे, मानसिक त्रासापोटी, तक्रारीच्या खर्चापोटी रक्कम देण्यात यावी, अशी मागणी तक्रारीत केली. आयोगाने दोन्ही बाजूचे म्हणणे ऐकल्यानंतर बुकिंगपोटी भरलेले १ लाख रुपये व्याजासह परत करण्याचा आदेश दिला.