CoronaVirus Positive News : देशातील रुग्ण कोरोनामुक्त होण्याचे प्रमाण ३१ टक्के तर पुण्याचे ४९

देशातील रुग्ण कोरोनामुक्त होण्याचे प्रमाण हे ३१ टक्के असून पुण्याचे ४९ टक्के

ठळक मुद्देगेल्या आठवड्याभरातील आकडेवारी पाहिली तर एक्टिव्ह रुग्णांची संख्या कमी आतापर्यंत १३७७ रुग्ण कोरोनामुक्तमृत्यूचा आकडा आठवड्याभरापासून दहाच्या खालीच

पुणे : शहरातील कोरोनाग्रस्तांचा आकडा जरी २ हजार ८२४ झाली असून प्रत्यक्षात अ‍ॅक्टिव्ह (प्रत्यक्षात उपचार घेत असलेले) १ हजार २८४ रुग्ण आहेत. गेल्या आठवड्याभरातील आकडेवारी पाहिली तर एक्टिव्ह रुग्णांची संख्या कमी होताना दिसत आहे. यासोबतच मृत्यूदर स्थिर ठेवण्यातही यश आले असून आठवड्याभरापासून मृत्यूचा आकडा सरासरी ६ एवढा असून हा दर स्थिर राहिला आहे. आतापर्यंत १३७७ रुग्ण कोरोनामुक्त झाले आहेत. एकूण रुग्णसंख्येच्या तुलनेत हा आकडा ४९ टक्के एवढा आहे.
शहरात कोरोनाचे रुग्ण झपाट्याने वाढत चालले आहेत. विशेषत: भवानी पेठ, शिवाजीनगर-घोले रस्ता, ढोले पाटील रस्ता, येरवडा-कळस-धानोरी आणि कसबा-विश्रामबाग या क्षेत्रीय कार्यालयांच्या हद्दीमध्ये सर्वाधिक रुग्ण आढळून आलेले आहेत. हे प्रमाण वाढतच चालले आहे. शहरातील या क्षेत्रीय कार्यालयांच्या हद्दीतील अति संक्रमित भाग पूर्णपणे सील करण्यात आला असून याठिकाणी लॉकडाऊनची कडक अंमलबजावणी केली जात आहे. प्रभावी उपचारांद्वारे रुग्ण संख्या कमी करण्यासाठी प्रयत्न केले जात आहेत. देशातील रुग्ण कोरोनामुक्त होण्याचे प्रमाण हे ३१ टक्के असून पुण्याचे ४९ टक्के आहे. ही सकारात्मक बाब असून आजवर कोरोनामुक्त झालेले रुग्ण जुन्या डिस्चार्ज पॉलिसीनुसार सोडण्यात आलेले आहेत. यापुढे नवीन डिस्चार्ज पॉलिसीप्रमाणे रुग्ण घरी सोडण्यात येणार आहेत. त्यानंतर, ही टक्केवारी वाढण्याची शक्यता आहे. आतापर्यंत १६३ रुग्णांचा मृत्यू झाला आहे.  
======
आठवड्यातील रुग्णांचा तपशील

तारीख           एकूण रुग्ण        डिस्चार्ज         एक्टिव्ह            बरे झालेले (एकूण)
06 मे              2029                  52                 1297                  587
07 मे               2146                   84                1350                 671
08 मे               2245                  61                 1377                  732
09 मे               2380                 96                 1414                  826
10 मे               2482                 194                1318                 1020
11 मे               2573                   69                 1335                 1089
12 मे              2737                   120                1372                1209
13 मे              2824                   168                1284                1377