प्रेम व्यक्त करण्याच्या आठवड्यामध्येच दाम्पत्याची आत्महत्या; पुणे जिल्ह्यातील धक्कादायक घटना

सकाळी उशीर झाला तरी दरवाजा उघडत नसल्याने कुटुंबीयांना शंका आल्याने दरवाजा वाजवला...

केडगाव (पुणे) : फेब्रुवारी महिन्यातील प्रेम व्यक्त करण्याच्या आठवड्यामध्येच पारगाव तालुका दौंड येथील दाम्पत्याने आत्महत्या केली आहे. विकास पोपटराव जगताप (वय ४२) व त्यांची पत्नी जयश्री विकास जगताप (वय ३८) असे आत्महत्या करणाऱ्या दाम्पत्याचे नाव आहे. विशेष म्हणजे जयश्री या विकासच्या मामाची मुलगी असल्याने दोघांचा प्रेम विवाह झाला होता. सदर घटना गुरुवारी (दि. ९) मध्यरात्रीच्या सुमारास घडली.

गुरुवारी सायंकाळी जेवण झाल्यानंतर जगताप दाम्पत्य आपल्या खोलीमध्ये झोपायला गेले. शुक्रवारी सकाळी उशीर झाला तरी दरवाजा उघडत नसल्याने कुटुंबीयांना शंका आल्याने दरवाजा वाजवला. परंतु आतून प्रतिसाद न मिळाल्याने ग्रामस्थांनी दरवाजा तोडण्याचा निर्णय घेतला. त्यावेळी शेजारील दोन खोल्यांमध्ये घरातील लोखंडी चॅनलला हे दाम्पत्य गळफास घेतलेल्या अवस्थेत आढळले. दोघांनी आत्महत्या नेमकी कशामुळे केली याबाबत अनेक तर्क-वितर्क लढविण्यात येत आहेत.

यवत पोलिसांनी घटनेचा पंचनामा केला असून, शवविच्छेदन करण्यात आले. शुक्रवारी दुपारच्या वेळी पारगाव येथे दोघांवर अंत्यसंस्कार करण्यात आले. यावेळी नातेवाइकांचा आक्रोश पिळवटून टाकणारा होता. विकास जगताप यांचा वाॅशिंग सेंटरचा व्यवसाय होता, तर पत्नी जयश्री यांचे ब्युटी पार्लर होते. त्यांच्या पश्चात वडील, भाऊ, भावजय, मुलगा असा परिवार आहे.