Pune: वीजचोरांना दणका, एकाच दिवशी ८३ लाखांचा अनधिकृत वीजवापर उघड

नियमानुसार दंड व वीजचोरीच्या रकमेचा भरणा न करणाऱ्या या वीजचोरांविरुद्ध भारतीय विद्युत कायद्याचे कलम १३५ नुसार फौजदारी कारवाई तर कलम १२६ प्रमाणे कारवाई करण्यात येत आहे.....

पुणे :महावितरणच्यापुणे प्रादेशिक विभागात एकाच दिवशी १ हजार २५१ ठिकाणी ८२ लाख ४२ हजार रुपयांचा अनधिकृत वीजवापर होत असल्याचे आढळून आले आहे. यामध्ये वीजतारेच्या हूकद्वारे किंवा मीटरमध्ये फेरफार केलेल्या ९९३ वीजचोऱ्यांचा समावेश आहे. तसेच अनधिकृत वीजवापराचे २५८ प्रकार आढळून आले आहेत. नियमानुसार दंड व वीजचोरीच्या रकमेचा भरणा न करणाऱ्या या वीजचोरांविरुद्ध भारतीय विद्युत कायद्याचे कलम १३५ नुसार फौजदारी कारवाई तर कलम १२६ प्रमाणे कारवाई करण्यात येत आहे.

महावितरणकडून वितरण व वाणिज्यिक हानी कमी करण्यासाठी वीजचोरीविरुद्ध परिमंडल अंतर्गत नियमित कारवाई सुरु आहे. त्यानुसार पश्चिम महाराष्ट्रात एकाच दिवशी धडक मोहीम राबविण्याचे निर्देश पुणे प्रादेशिक संचालक अंकुश नाळे यांनी दिले. त्यानुसार पुणे, सोलापूर, सातारा, सांगली, कोल्हापूर जिल्ह्यांमध्ये शनिवारी (दि. ४) वीजचोरीविरोधात विशेष मोहीम राबविण्यात आली. या मोहिमेत नाळे यांच्यासह वरिष्ठ अधिकारी सहभागी झाले होते. या मोहिमेत १ हजार २५१ ठिकाणी ८२ लाख ४२ हजार रुपयांच्या विजेचा अनधिकृत वापर उघड झाला आहे. यामध्ये पुणे जिल्ह्यात ५७८ ठिकाणी ४६ लाख १५ रुपये, सातारा जिल्ह्यात ९२ ठिकाणी ७ लाख ३४ हजार, सोलापूर जिल्ह्यात २७४ ठिकाणी १३ लाख ३८ हजार, कोल्हापूर जिल्ह्यात ९८ ठिकाणी ६ लाख ७५ हजार आणि सांगली जिल्ह्यामध्ये २०९ ठिकाणी ८ लाख ८० हजार रुपयांचा अनधिकृत वीजवापर उघड झाला आहे.

वीजचोरीविरुद्ध नियमितपणे सुरु असलेली मोहीम आणखी वेगवान करण्याचे आदेश नाळे यांनी दिले आहेत.
वीजचोरी प्रकरणात ज्यांनी दंडात्मक रकमेसह चोरीच्या वीजवापराप्रमाणे संपूर्ण बिलाची रक्कम भरली नाही तर त्यांच्याविरुद्ध कलम १३५ नुसार फौजदारी कारवाई करण्यात येत आहे. वीजचोरी केल्यास विद्युत अपघाताचा मोठा धोका असतो. त्यामुळे विजेची चोरी करण्याऐवजी अधिकृत वीजजोडणी घेऊन सुरक्षित वीजपुरवठा घ्यावा व फौजदारी कारवाई व कारावासाची शिक्षा टाळावी असे आवाहन महावितरणकडून करण्यात आले आहे.