Crime: प्रसिद्ध महाविद्यालयातील तरुणीवर चोरीचा आळ घेत मित्र-मैत्रिणींनीच कपडे उतरवले, ५ जणांवर गुन्हे दाखल

Crime News: पुण्यातील प्रसिद्ध महाविद्यालयात शिक्षण घेणाऱ्या तरुणीवर चोरीचा आळ घेऊन तिच्याच मित्र आणि मैत्रिणींनी तिचे कपडे उतरवल्याचा धक्कादायक प्रकार उघडकीस आला आहे.

- किरण शिंदे

पुणे-  पुण्यातील प्रसिद्ध महाविद्यालयात शिक्षण घेणाऱ्या तरुणीवर चोरीचा आळ घेऊन तिच्याच मित्र आणि मैत्रिणींनी तिचे कपडे उतरवल्याचा धक्कादायक प्रकार उघडकीस आला आहे. आरोपींनी व्हिडिओ व्हायरल करण्याची धमकी देऊन तिच्याकडून 80 हजार रुपये जबरदस्तीने घेतले. लोणीकंद पोलीस स्टेशनच्या हद्दीतील वाघोलीत 17 ऑक्टोबर रोजी ही घटना घडली. याप्रकरणी लोणीकंद पोलीस स्टेशनमध्ये तीन तरुणींसह पाच जणांवर गुन्हे दाखल करण्यात आले आहेत. पीडित मुलीच्या आईने तक्रार दिली आहे. 

याप्रकरणी अधिक माहिती अशी की, पीडित मुलगी ही हरियाणा राज्यातील मोडियाखेडा गावची रहिवाशी आहे. वाघोली येथील लेक्सिकॉन मॅनेजमेंट इन्स्टिट्यूटमध्ये ती शिक्षण घेत होती. तर आरोपी देखील त्याच इन्स्टिट्यूटमध्ये शिक्षण घेतात. एकाच महाविद्यालयात शिक्षण घेत असल्याने पीडित तरुणी आणि आरोपींपैकी दोन तरुणी या वाघोली येथील फ्लॅटमध्ये राहण्यासाठी होत्या. त्यांच्या रूममध्ये चोरी झाली होती. पीडित मुलीला घरमालकावर संशय असल्याने तिने रूम बदलली आणि दुसऱ्या मुलींसोबत राहण्यासाठी गेली.

दरम्यान दुसऱ्या रूममध्ये राहत असताना आरोपी त्या फ्लॅटमध्ये गेले आणि त्यांनी पीडित तरुणीला शिवीगाळ करत चोरी केल्याचा आरोप केला. लॅपटॉप आणि सोन्याची चैन तू चोरली असे बोलून एका खोलीत घेऊन जात तिचे कपडे काढून झडती घेतली. याबद्दल कुणाला काही सांगितल्यास व्हिडिओ बनवून व्हायरल करण्याची धमकीही दिली. तर तिच्या विरोधात पोलिसात तक्रार देण्याची धमकी देऊन तिच्याकडून 80 हजार रुपये ऑनलाईन ट्रान्सफर करून घेतले.

आणखी पैशाच्या मागणी करत आरोपी तरुण तरुणींनी तिला हाताने मारण्यास सुरुवात केली होती. परंतु पीडित तरुणीने आरडाओरडा केल्यानंतर आजूबाजूचे लोक त्या ठिकाणी आले आणि त्यानंतर आरोपी पळून गेले. या सर्व प्रकाराने घाबरलेली तरुणी आपल्या मूळ गावी गेली होती. तिथे गेल्यानंतर या तरुणीच्या आईने हरियाणा राज्यातील सिरसा पोलीस ठाण्यात तक्रार दिली होती. ही तक्रार लोणीकंद पोलीस ठाण्यात वर्ग करण्यात आली आहे. पोलिसांनी या प्रकरणी गुन्हा दाखल केला असून अधिक तपास सुरू आहे.