ट्रॅक्टरच्या धडकेने सायकलस्वार मुलाचा मृत्यू

लोकमत न्यूज नेटवर्क

पुणे : रस्त्याच्या कडेला सायकल घेऊन उभा असताना ट्रॅक्टरने धडक दिल्याने झालेल्या अपघातात एका १० वर्षांच्या मुलाचा मृत्यू झाला.

प्रदीप जयानंद गायकवाड (वय १०, रा. शेळकेवस्ती, बिबवेवाडी) असे या मुलाचे नाव आहे. याप्रकरणी ट्रॅक्टरचालक चंद्रकांत लक्ष्मण कोळी (वय २७, रा. येवलेवाडी) यांच्याविरुद्ध गुन्हा दाखल करण्यात आला आहे.

प्रदीप गायकवाडचा मामा सिद्धराम मेलकेरी (वय २२, रा. बिबवेवाडी) यांनी फिर्याद दिली आहे. प्रदीप सोमवारी दुपारी दोनच्या सुमारास शेळकेवस्ती परिसरात सायकलवरून जात होता. काही अंतरावर त्याचा मामा सिद्धराम थांबला होता. प्रदीप सायकल घेऊन रस्त्याच्या कडेला थांबला होता. त्याचवेळी बांधकामाचा राडारोडा घेऊन आलेल्या ट्रॅक्टरने प्रदीपला धडक दिली. त्यात प्रदीपचा मृत्यू झाला. अपघात झाल्यानंतर स्थानिक नागरिकांनी ट्रॅक्टरचालक कोळी याला चोप दिला असून कोळी याला रुग्णालयात उपचारासाठी दाखल करण्यात आले आहे.