खरपुडीच्या सरपंचावर जीवघेणा हल्ला

लोकमत न्यूज नेटवर्क

राजगुरूनगर : खेड तालुक्यातील खरपुडी गावाचे सरपंच विशाल अशोक काशीद यांच्यावर काही हल्लेखोरांनी जीवघेणा हल्ला करण्याचा प्रयत्न केला. त्यांच्या मोटारीची काच फोडून त्यांच्यावर पिस्तूल रोखले. मात्र, सरपंच काशीद यांनी चारचाकी जोरात चालविल्यामुळे ते बालंबाल बचावले. या घटनेने खरपुडी परिसरात खळबळ उडाली आहे. ही घटना गुरुवारी (दि. १६) रात्री घडली. याप्रकरणी चाैघांविरोधात खेड पोलीस ठाण्यात फिर्याद दिली आहे.

खरपुडीचे सरपंच विशाल काशीद व त्यांचा मित्र हे गुरुवारी रात्री साडेदहा वाजेच्या सुमारास हॉटेलमध्ये जेवण करून घरी जात होते. खेड-कनेरसर मार्गावरून ते खरपुडी गावालगत कच्च्या रस्त्यावरून चारचाकीत घरी जात असताना दोन दुचाकीवरून चार व्यक्तींनी येऊन सरपंच काशीद यांच्या चारचाकीला दुचाकी आडव्या लावल्या. चौघांनी तोंडाला रुमाल बांधले असल्यामुळे ते कोण होते हे सरपंच काशीद यांना ओळखू आले नाही. दरम्यान, एकाने लाकडी दांडक्याने गाडीची काच फोडण्याच्या प्रयत्न केला. तो असफल झाल्यानंतर दगडाने काच फोडली. ‘तुला लई माज आला आहे, तुझा माज जिरवितो’ असे म्हणून पिस्तूल काढून सरपंच काशीद यांच्यावर रोखले. प्रसंगाधाव राखत सरपंच काशीद यांनी चारचाकी जोरात चालविल्यामुळे या घटनेतून ते बालंबाल बचावले. या घटनेबाबत सरपंच काशीद यांनी चार जणांविरुद्ध खेड पोलीस ठाण्यात फिर्याद दिली आहे. खरपुडी गावात लाखो रुपयांची विकासकामे सुरू आहेत. हे विरोधकांना पाहवत नसल्यामुळे राजकीय द्वेषातून माझ्यावर जीवघेणा हल्ला झाला असल्याचे सरपंच काशीद यांनी सांगितले.