एक तासापूर्वीच माहेरी आली अन् काळाचा घाला! नवविवाहितेचा वीज पडून मृत्यू, दौंड तालुक्यातील घटना

गुरांना घास आणण्यासाठी भावा सोबत शेतात गेली असताना अचानक वीज पडून दुर्दैवी मृत्यू झाला

यवत : कासुर्डी (ता. दौंड) येथे माहेरी आलेल्या नवविवाहितेचा वीज पडून दुर्दैवी मृत्यू झाला. ही घटना मंगळवारी (दि. ११) रोजी सायंकाळी पाच वाजण्याच्या सुमारास कासुर्डी गावातील सोनजाई मंदिराजवळ घडली.

पोलिस पाटील अश्विनी सोनवणे यांनी याबाबत दिलेल्या अधिक माहितीनुसार सुहानी तुषार तम्मनर (वय २२, रा. विश्रांतवाडी, पुणे) ही विवाहिता तिच्या माहेरी कासुर्डी येथे आली होती. वडील सुदाम दगडू ठोंबरे यांच्या शेतात कामे सुरू असल्याने कुटुंबातील सर्व शेतात होते. सुहानी हीसुद्धा तिच्या कुटुंबासमवेत शेतात गेली होती. वातावरण ढगाळ होते मात्र सकाळपासूनच पावसाने उघडीप दिली होती. सायंकाळी साडेचार वाजण्याच्या सुमारास अचानक जोरदार वाऱ्यासह विजा चमकण्यास सुरुवात झाली. काही कळण्याच्या आत एक जोरदार आवाज होऊन वीज सुहानी हिच्या अंगावर पडली. कुटुंबीयांनी तिला तातडीने उरुळी कांचन येथील खासगी दवाखान्यात उपचारासाठी नेले. मात्र दुर्दैवाने उपचारापूर्वीच तिचे निधन झाले.

एक तासापूर्वीच आली होती माहेरी

मागील वर्षीच सुहानी हिचा विवाह झालेला होता. तिचे सासर विश्रांतवाडी पुणे येथील होते. तिच्या मावशीच्या मुलीचे लग्न असल्याने माहेरी आली होती. गुरांना घास आणण्यासाठी भावा सोबत शेतात गेली असताना अचानक वीज पडून दुर्दैवी मृत्यू झाल्याने परिसरात हळहळ व्यक्त केली जात आहे.