Pune: घरगुती कारणावरून मोठ्या भावाला लहान भावांनी केली मारहाण, गुन्हा दाखल

फिर्यादी हा लिंबू विक्रीचा व्यवसाय करत असून रविवारी रात्री तो घरी असताना घरातील पुजेच्या कारणावरून तीन लहान भावांसह भावजयी बरोबर त्याचा वाद झाला...

धनकवडी: घरगुती कारणातून छोट्या भावासह चौघांनी एकास शिवीगाळ करत लाथा बुक्क्यांनी आणि काठीने मारहाण केली. ही घटना रविवारी रात्री आठ वाजता शनी मंदिराजवळ चव्हाण नगर येथे घडली. या प्रकरणी सहकारनगर पोलीस ठाण्यात एका महिलेसह चौघांविरुद्ध मारहाणीचा गुन्हा दाखल करण्यात आला आहे.

भावड्या सुरेश पवार, संतोष सुरेश पवार, अनिल सुरेश पवार व कावेरी भावड्या पवार, राहणार चौघेही चव्हाणनगर, शनी मंदीराजवळ, धनकवडी अशी मारहाण करणाऱ्यांची नावे आहेत. या प्रकरणी जखमी सुनिल सुरेश पवार यांनी सहकारनगर पोलीस ठाण्यात फिर्याद दाखल केली आहे.

पोलिसांनी दिलेल्या माहितीनुसार, फिर्यादी हा लिंबू विक्रीचा व्यवसाय करत असून रविवारी रात्री तो घरी असताना घरातील पुजेच्या कारणावरून तीन लहान भावांसह भावजयी बरोबर त्याचा वाद झाला. वाद झाल्यानंतर तिघा भावांनी व भावजयने शिवीगाळ करत मारहाण करून जखमी केले. दरम्यान उपचारासाठी त्यांना खाजगी रुग्णालयात दाखल करण्यात आले. याप्रकरणी सहकारनगर पोलिसांनी चौघांनाही चौकशीसाठी ताब्यात घेतले असून पुढील तपास पोलीस अंमलदार खुटवड करत आहेत.