चंद्रकांत पाटील झोपेत असताना बोलले की जागे असताना?

उपमुख्यमंत्री अजित पवार यांचा मिश्कील सवाल

उपमुख्यमंत्री अजित पवार यांची मिश्कील टीका : बारामती येथे कोरोना आढावा बैठक

लोकमत न्यूज नेटवर्क

बारामती : महाविकास आघाडीचे सरकार स्थापन झाल्यापासून चंद्रकांत पाटील यांना असह्य झाले आहे. आपल्या जागा जास्त आल्या, तरी आपले सरकार स्थापन होऊ शकले नाही याची बोचणी त्यांना लागून आहे. या मानसिकतेतून ते बाहेर यायला तयार नाहीत. महाराष्ट्र झोपेत असताना हे सरकार पडेल असे विधान त्यांनी झोपेत असतानाच केले की जागे असताना केले, असा मिश्कील सवाल उपमुख्यमंत्री अजित पवार यांनी भाजपचे प्रदेशाध्यक्ष चंद्रकांत पाटील यांना केला.

बारामती येथे शनिवार (दि. २९) उपमुख्यमंत्री अजित पवार यांच्या अध्यक्षतेखाली कोरोना आढावा बैठक झाली. यानंतर माध्यमांशी ते बोलत होते. पवार म्हणाले की, काँग्रेस अध्यक्षा सोनिया गांधी, राष्ट्रवादीचे अध्यक्ष शरद पवार व शिवसेना पक्षप्रमुख, मुख्यमंत्री उद्धव ठाकरे यांनी महाविकास आघाडी सरकारचा स्थापन करण्याचा निर्णय घेतला आहे. जोपर्यंत ते आपल्या निर्णयाशी ठाम आहेत, तोपर्यंत या सरकारला कसलाही धोका नाही. मराठा आरक्षणाबाबत इतर कोणत्याही वर्गाच्या आरक्षणाला धक्का न लागता खबरदारी राज्य सरकार घेत आहे. अलाहाबाद उच्च न्यायालयाचे माजी मुख्य न्यायाधीश दिलीप भोसले यांच्या अध्यक्षतेखाली समिती तयार केली आहे. ते मराठा आरक्षणाबाबत अभ्यास करत आहेत. राज्य सरकार सर्वच जाती-धर्माच्या लोकांना न्याय देण्यासाठी सकारात्मक आहे. कोरोनाकाळात शेतीव्यवसायाने देशाचा जीडीपी टिकवला आहे. खरिपाच्या अनुषंगाने शेतीउपयोगी औषधे, अवजारे व खतांची दुकाने उघडण्यास परवानगी देण्यात आली आहे.

चौकट

परदेशातील लसींना परवानगी द्यावी : अजित पवार

तिसऱ्या लाटेच्या अनुषंगाने खबरदारी घेण्यात येत आहे. दुसऱ्या लाटेमध्ये जेवढ्या अडचणी आल्या त्या अडचणी येऊ नयेत, यासाठी काटेकोर नियोजन करण्यात येत आहे. परदेशातील लसींना तातडीने परवानगी देण्यात यावी, तसेच या लसी मिळवण्यासाठी केंद्राने प्रयत्न केले तर लसीकरण मोहिमेला वेग येणार आहे, असेही उपमुख्यमंत्री अजित पवार म्हणाले. बारामती येथील रुई ग्रामीण रुग्णालयामध्ये म्युकरमायकोसिस आजारावर उपचार करण्यासाठी यंत्रणा उभी करण्याचा प्रस्ताव आला आहे. ज्या त्या भागातील रुग्णांनी आपापल्या भागात उपचार घेतल्यास आरोग्य यंत्रणेवर ताण येणार नाही. मात्र, कोणत्याही भागातील रुग्ण कोठेही उपचार घेऊ शकतात. तो रुग्णाचा अधिकार आहे. त्यामुळे या साथरोगावर दर्जेदार उपचार देण्यासाठी आरोग्य विभाग व शासन सकारात्मक आहे, असेही या वेळी पवार म्हणाले.

---------------------------