पुणे विभागातल्या १९ नवउद्योजकांना दीड कोटीचे वाटप

पुणे : केंद्र सरकारच्या स्टँड अप इंडिया योजनेंतर्गत पुणे विभागातल्या सदर योजनेंतर्गत १९ नव उद्योजकांना १ कोटी ४० लाख ८७ हजार रुपयांचे अर्थसाह्य मंजूर करण्यात आले आहे. सन २०२१-२१ या अर्थिक वर्षाासाठी एकूण ५१ नवउद्योजकांचे अर्ज आले होते.

समाज कल्याण विभागाच्या पुणे कार्यालयाने छाननी करून सातारा जिल्ह्यातील ९ अर्जदारांना ५५ लाख २५ हजार रुपये, सांगली जिल्ह्यातील ९ अर्जदारांना ७३ लाख ३ हजार रुपये, कोल्हापूर जिल्ह्यातील २ अर्जदारांना १२ लाख ५९ हजार रुपये अशी मदत केली. या योजनेंतर्गत महाराष्ट्र राज्यातील अनुसूचित जातीसाठीच्या सवलती घेण्यास पात्र अनुसूचित जाती व नवबौद्ध घटकांतील नवउद्योजकांना १०% स्वहिस्सा भरणा केल्यानंतर व बँकेने अर्जदारास स्टँड अप इंडिया योजनेंतर्गत ७५% कर्ज मंजूर केल्यानंतर उर्वरित १५% रक्कम राज्य शासनाच्या सामाजिक न्याय विभागाकडून देण्यात येत आहे.

केंद्र शासनाने सन २०१५ मध्ये ‘स्टँड अप इंडिया’ ही योजना घोषित केलेली आहे. या अंतर्गत अनुसूचित जाती व नवबौद्ध समाजाच्या घटकांकरिता ‘मार्जिन मनी’ देण्याचा निर्णय शासनाने घेतला. केंद्र शासनाच्या ‘स्टँड अप’ योजनेंतर्गत राज्यात सवलती घेण्यास पात्र अनुसूचित जाती व नवबौद्ध घटकातील नवउद्योजक लाभार्थ्याना ‘मार्जिन मनी’ भरण्याची क्षमता नसल्याने त्यांना एकूण प्रकल्प किमतीच्या जास्त पंधरा टक्के ‘मार्जिन मनी’ उपलब्ध करून दिला जातो. या योजनेसाठी अनुसूचित जाती व नवबौद्ध घटकातील नवउद्योजकांनी जास्तीत जास्त अर्ज सादर करावेत, असे आवाहन समाज कल्याण प्रादेशिक उपायुक्त बाळासाहेब सोळंकी यांनी केले आहे.