डॉक्टरनेच लपवला महिला डॉक्टरांच्या स्नानगृहात स्पाय कॅमेरा

पुणे : भारती विद्यापीठ परिसरातील एका प्रशिक्षणार्थी डॉक्टर महिलेच्या स्नानगृह व शयनकक्षात स्पाय कॅमेरा लावण्यामागे एका डॉक्टराचा हात असल्याचे निष्पन्न झाले आहे.

याप्रकरणी सुजित आबाजीराव जगताप (वय ४२) या डॉक्टरला अटक करण्यात आली आहे. जगतापने ॲमेझॉनवरून स्पाय कॅमेरा बल्ब मागवल्याचे तपासात समोर आले आहे. हा प्रकार ६ जुलैला घडला होता. सुजित जगताप हा एमडी असून त्यांचे हिराबाग येथे क्लिनिक आहे. भारती विद्यापीठ परिसरातील एका रुग्णालयात जगताप लेक्चरसाठी गेला होता.

याप्रकरणी एका प्रशिक्षणार्थी महिला डॉक्टरांनी फिर्याद दिली होती. या महिला डॉक्‍टर एका नामांकित महाविद्यालयाशी संलग्न रुग्णालयात काम करतात. या रुग्णालयाच्या सर्व्हिस क्वार्टरमध्येच त्या आणखी एका महिला डॉक्‍टरांसह राहतात. मंगळवारी संध्याकाळी रुग्णालयातील काम उरकल्यावर त्या खोलीवर परतल्या होत्या. यावेळी स्नानगृहातील दिवा न लागल्याने त्यांनी दुरुस्तीसाठी तंत्रज्ञाला बोलावले. त्याने दुरुस्तीसाठी बल्बचे होल्डर उघडल्यावर आत स्पाय कॅमेरे, त्याचे मेमरी कार्ड आणि बॅकअप आढळला. शयनकक्षातील बल्बचे होल्डर उघडल्यानंतर तेथेही असाच प्रकार आढळून आला. यानंतर संबंधित महिला डॉक्टरने तातडीने पोलिसांकडे धाव घेतली.

या गुन्ह्याचा तपास करताना गेल्या ४ दिवसांपासून पोलीस परिसरातील सीसीटीव्ही पाहात होते. सुरक्षा रक्षक, फिर्यादी यांना संशय वाटत असलेल्यांकडे चौकशी करत होते. दरम्यान, एका सीसीटीव्हीमध्ये डॉ. जगताप कैद झाला होता. त्याला चौकशीसाठी बोलविल्यानंतर त्याने गुन्ह्याची कबुली दिली असल्याचे पोलिस सूत्रांनी सांगितले.

चौकट

पोलीस निरीक्षक संगीता यादव यांनी सांगितले, “सुजित जगताप हा मेंदूविकारतज्ज्ञ आहे. तांत्रिक विश्लेषणाद्वारे पोलीस या आरोपीपर्यंत पोहोचले. हे कृत्य आरोपीने का केले हे अजूनही त्याने सांगितलेले नाही.” दरम्यान, हे घृणास्पद कृत्य का केले, कधी केले, हे आपल्याला आठवत नसल्याचे जगताप सांगत असल्याचे सूत्रांनी सांगितले.