कुत्रा आईच्या अंगावर भुंकल्याने तरुणीला मारहाण

लोकमत न्यूज नेटवर्क

पुणे : तरुणीने ज्या कुत्र्याला खायला टाकले, तो आईवर भुंकल्याने चिडलेल्या चौघा जणांनी या तरुणीला बेदम मारहाण करून जखमी केले. कोथरूड पोलिसांनी या चौघांवर गुन्हा दाखल केला आहे.

राजाराम मारुती चौधरी, त्यांची आई मालुबाई चौधरी, पत्नी बायडा राजाराम चौधरी आणि मंदाकिनी चौधरी (सर्व रा. म्हातोबानगर, कोथरूड) अशी गुन्हा दाखल केलेल्यांची नावे आहेत.

याप्रकरणी निशा पंडित थरकुडे (वय ४०, रा. म्हातोबानगर, कोथरूड) यांनी फिर्याद दिली आहे. याबाबत पोलिसांनी दिलेल्या माहितीनुसार, फिर्यादी व आरोपी हे शेजारी राहण्यास आहेत. फिर्यादी यांनी ३० डिसेंबर २०२० रोजी रात्री पावणेअकराच्या सुमारास एका कुत्र्याला खायला टाकले होते. ते कुत्रे राजाराम चौधरी यांच्या आईच्या अंगावर भुंकले. या कारणावरून आरोपींनी फिर्यादी यांना शिवीगाळ करून डाव्या हाताची करंगळी पकडून जाेरात वाकवून त्यांना जबर दुखापत केली. त्यामुळे फिर्यादींचे शारीरिक व आर्थिक नुकसान झाले. त्यामुळे गुन्हा दाखल करण्यात आला आहे.

फिर्यादी यांनी हा प्रकार घडला तेव्हा कोथरूड पोलिसांकडे तक्रार अर्ज दाखल केला होता. त्या तक्रारीची चौकशी व्हावी, यासाठी त्यांनी प्रथमवर्ग न्यायदंडाधिकारी यांच्याकडे अर्ज केला होता. त्यावरून हा गुन्हा दाखल करण्यात आला आहे. पोलीस उपनिरीक्षक चव्हाण तपास करीत आहेत.